Առանց ռազմաճակատում ուկրաինական ուժեղ դիրքի՝ կլինեն միայն վերջնագրեր

ԱՄՆ նախագահի դեսպանորդներ Ջարեդ Քուշները եւ Սթիվեն Ուիթքոֆը Ուկրաինայի մայրաքաղաք են բերել պատերազմի դադարեցման ուղիների վերաբերյալ որոշ «նոր գաղափարներ», ինչի մասին հայտնել են Կիեւում կայացած մամուլի ասուլիսում։ BBC-ն գրում է, որ Քուշների եւ Ուիթքոֆի այցը Կիեւ պատերազմի սկսվելուց ի վեր առաջինն է։ Մինչ այդ՝ Ուիթքոֆն ութ անգամ հանդիպել է Ռուսաստանի նախագահ Վլադիմիր Պուտինի հետ, այդ թվում՝ երեք անգամ ԱՄՆ նախագահի փեսա Քուշների հետ միասին։

Այս տարվա ամռանը ԱՄՆ-ը հայտարարել էր, որ Ուկրաինայում խաղաղության հաստատման վերաբերյալ Վաշինգտոնի նախկին գաղափարները չեն աշխատել, եւ այժմ անհրաժեշտ են նոր առաջարկներ։ Այս բանակցությունների մասնակիցներն ասում են, որ նման գաղափարներ իսկապես ի հայտ են եկել, սակայն չեն բացահայտում դրանց էությունը։ «Մի քանի նոր գաղափարներ կային, մենք դրանք քննարկեցինք։ Առայժմ մեզ հնարավորություն տվեք խորապես վերլուծել դրանք, հասկանալ, թե ինչ մանրամասներ կան, ինչ քայլեր կարող են լինել եւ արդյոք դա մեզ կմոտեցնի խաղաղությանը։ Իսկ հետո արդեն կխոսենք հասարակության հետ»,- մամուլի ասուլիսում ասել է Զելենսկին։ Ուիթքոֆը հայտնել է, որ կողմերը պատրաստվում են նոր հանդիպման՝ եռակողմ ձեւաչափով, այսինքն՝ Ուկրաինայի, ԱՄՆ-ի եւ Ռուսաստանի պատվիրակությունների մասնակցությամբ։ Վերջին մեկ տարվա ընթացքում արդեն մի քանի նման հանդիպում տեղի է ունեցել, սակայն դրանք փետրվարին դադարեցվել էին  ԱՄՆ-ի եւ Իսրայելի՝ Իրանի դեմ պատերազմն սկսվելուց հետո։

«Անհրաժեշտ է, որ երկու կողմերն էլ գնան փոխզիջումների, որպեսզի նրանց միջեւ տարաձայնությունները նվազեն։ Մենք կարծում ենք, որ ունենք այն բաղադրիչները, որոնք թույլ կտան հասնել այդ կետին»,- Կիեւում ասել է Թրամփի հատուկ ներկայացուցիչը։

Մամուլի ասուլիսի ժամանակ Զելենսկուն հարցրել են՝ արդյո՞ք ամերիկյան նոր առաջարկներում տեղ է գտել Դոնբասի խնդիրը։ «Դոնբասի հարցը միայն Դոնբասի հարցը չէ։ Մեր միջեւ, ես կարծում եմ, որ սա այս պատերազմի հարցն է։ Պատերազմի, որը եւ գոյատեւման, եւ հյուծման համար է։ Տարածքային այս հարցը ռուսական կողմի նպատակն է»,- ասել է Զելենսկին։

Ուկրաինայի նախագահը  հավելել է, որ վերջին մեկ տարվա ընթացքում Ուկրաինայի զինված ուժերին հաջողվել է ամրապնդել իրենց դիրքերը ռազմաճակատում, ինչի շնորհիվ Կիեւը կարող է բանակցություններ վարել խաղաղության շուրջ։ «Մեր տղաները լավ են անում, որ հնարավորություն են տալիս աշխատել դիվանագիտությանը։ Առանց ռազմաճակատում ուկրաինական ուժեղ դիրքի՝ կլինեն միայն վերջնագրեր։ Իսկ այսպես այսօր դիվանագիտությունը հնարավոր է»,- հայտարարել է նա։

Միեւնույն ժամանակ, բրիտանական Financial Times-ը, վկայակոչելով բանակցությունների ընթացքին ծանոթ աղբյուրներին, հայտնել է, որ «ամերիկացիները բերել են նախորդ փաստաթղթերի թարմացված տարբերակները, որոնք վերանայվել են՝ հաշվի առնելով փետրվարին բանակցությունների փակուղի մտնելուց հետո փոխված հանգամանքները»։

«Այս մարդիկ հայտնել են, որ երկու բանագնացները նոր քիչ գաղափարներ են բերել եւ պարզապես փորձել են վերակենդանացնել նախորդ առաջարկները  ու նվազեցնել Կիեւի եւ Մոսկվայի միջեւ տարաձայնությունները», - գրել է FT- ն։ Պարբերականը նշում է, որ գլխավոր հարցը շարունակում է մնալ «Ուկրաինայի վերահսկողության տակ գտնվող Դոնբասի տարածքը»։

Բացի այդ, FT-ի թղթակցի աղբյուրների խոսքով՝ կողմերն ընդհանուր առմամբ համաձայն են, որ պատերազմը, ամենայն հավանականությամբ, չի ավարտվի մինչեւ ձմեռը, թեեւ Զելենսկին եւ նրա թիմը հույս ունեն առաջիկա ամիսներին ինչ-որ առաջընթացի հասնել։