ԱՄՆ և Կանադայի քաղաքացիների վարորդական վկայականների տվյալների արտահոսք է եղել

ԱՄՆ Հետաքննությունների դաշնային բյուրոն (FBI) հետաքննում է այն հաղորդագրությունը, ըստ որի՝ ԱՄՆ-ի և Կանադայի քաղաքացիներին պատկանող տասնյակ միլիոնավոր վարորդական վկայականներ վաճառվում են դարկնեթում (darknet):

Անկախ լրագրող Բրայան Կրեբսը հայտնել էր, որ դարկնեթում հայտնաբերել է կայք, որը վաճառում է ԱՄՆ-ի և Կանադայի քաղաքացիների միլիոնավոր վարորդական վկայականների թվային սկանավորված տարբերակները: Նրա խոսքով՝ ինքը 9 անձանց միջոցով հաստատել է վաճառվող տվյալների իսկությունը: ՀԴԲ-ն հայտնել է, որ «ուսումնասիրում է միջադեպը», սակայն չի կարող մեկնաբանել իրավիճակը՝ «ընթացող հետաքննության պատճառով»։

Եթե տեղեկությունը հաստատվի, սա կարող է դառնալ Հյուսիսային Ամերիկայի պատմության մեջ պետական անձնական փաստաթղթերի տվյալների արտահոսքի խոշորագույն դեպքերից մեկը՝ անձնական տվյալների գողության և խարդախության ռիսկեր ստեղծելով տասնյակ միլիոնավոր մարդկանց համար:

Կրեբսը պատմել է, որ կայքի մասին իմացել է այն բանից հետո, երբ այն գովազդվել է կիբեռհանցագործների ռուսական ֆորումում, որտեղ որպես անվճար նմուշ առաջարկվել է հենց իր վարորդական վկայականը: Կրեբսի փոխանցմամբ՝ Nexus անվանումը ստացած ծառայությունը պնդում էր, որ տիրապետում է ԱՄՆ-ի և Կանադայի քաղաքացիների տասնյակ միլիոնավոր վարորդական վկայականների, ինչպես նաև միլիոնավոր այլ անձնագրերի ու ճանապարհորդական փաստաթղթերի և հարյուր հազարավոր բժշկական գրանցումների: Կրեբսը նշել է, որ գողացված տվյալների բազան, ըստ ամենայնի, թարմացվել է իրական ժամանակում, ինչը նշանակում է, որ այն լրացվում է ընթացիկ արտահոսքից ստացվող տվյալներով: