ԱՄՆ-ն վստահ է, որ Իսլանդիայում հանրաքվեի արդյունքները չեն ազդի ՆԱՏՕ-ին նրա անդամակցության վրա

Վաշինգտոնը վստահ է, որ Իսլանդիան կմնա ՆԱՏՕ-ում՝ չնայած երկրի բնակիչները դեմ են քվեարկել Եվրամիությանն անդամակցության շուրջ բանակցությունների վերսկսմանը։ Պետքարտուղարության խոսնակ Թոմի Փիգոթն այս մասին հայտարարություն է տարածել։ «Մենք հարգում ենք իսլանդացի ժողովրդի ինքնիշխան որոշումը և վստահություն ենք հայտնում, որ Իսլանդիան կշարունակի մնալ ՆԱՏՕ-ի ուժեղ և արժեքավոր դաշնակից և Միացյալ Նահանգների ու Եվրոպայի մտերիմ գործընկեր», - նշված է հաղորդագրության մեջ։

Փիգոթը հավելել է, որ Միացյալ Նահանգները ձգտում է «Իսլանդիայի հետ ավելի ամուր գործընկերության բոլոր ոլորտներում», այդ թվում՝ անվտանգության, էներգետիկայի, նորարարության, տնտեսության և մշակույթի։

Օգոստոսի 29-ին Իսլանդիայում հանրաքվե է անցկացվել ԵՄ անդամակցության շուրջ բանակցությունների վերսկսման վերաբերյալ։ Ընտրողների ավելի քան 52%-ը դեմ է քվեարկել բանակցությունների վերսկսմանը։ ԵՄ անդամակցությանը հակառակորդները մատնանշում են Իսլանդիայի ինքնիշխանության խաթարման և ձկնորսության հետ կապված սահմանափակումների ռիսկերը։

Իսլանդիան առաջին անգամ Եվրամիությանը միանալու դիմում է ներկայացրել 2009 թվականին։ Սակայն 2013 թվականին կառավարությունը կասեցրեց գործընթացը, քանի որ Իսլանդիայի տնտեսությունն արագ վերականգնվում էր։ Իսլանդիան Շենգենյան գոտու և Եվրոպական տնտեսական գոտու անդամ է։