Թրամփի խաղաղասիրական հայտարարությունից հետո Հյուսիսային Կորեան բալիստիկ հրթիռներ է արձակել

Հյուսիսային Կորեան Ճապոնական ծովում մի շարք փոքր հեռահարության բալիստիկ հրթիռներ է արձակել, հայտնում է հարավկորեական «Յոնհապ» գործակալությունը` վկայակոչելով երկրի Շտաբների պետերի միացյալ կոմիտեն։

Կոմիտեի տվյալներով՝ օգոստոսի 20-ին, տեղական ժամանակով մոտավորապես ժամը 17:00-ին, Փհենյանի շրջանում արձակվել է 12 հրթիռ։ Կոմիտեն ԱՄՆ-ի հետախուզական ծառայությունների ու Ճապոնիայի զինված ուժերի հետ համագործակցությամբ ուժեղացրել է դիտարկումը՝ սպասելով նոր արձակումների։

Հարավային Կորեայի նախագահի ազգային անվտանգության վարչությունը պաշտպանության նախարարության եւ Գլխավոր շտաբի պաշտոնյաների մասնակցությամբ խորհրդակցություն է հրավիրել՝ վտանգը գնահատելու եւ արձագանքման միջոցներ մշակելու համար։

Հրթիռային փորձարկումները տեղի են ունեցել ԱՄՆ նախագահ Դոնալդ Թրամփի հայտարարությունից անմիջապես հետո։ Սպիտակ տան ղեկավարը  պատրաստակամություն էր հայտնել վերսկսել 2019 թվականին ընդհատված երկխոսությունը ԿԺԴՀ առաջնորդ Կիմ Չեն Ընի հետ՝ Կորեական թերակղզու «միջուկազերծման» շուրջ։

Թրամփը Պենտագոնին հանձնարարել է կրճատել հարավկորեացիների հետ համատեղ անցկացվող զորավարժությունները, քանի որ, ըստ նրա, լայնածավալ զորավարժությունները կարող են Փհենյանին «անտեղի եւ թշնամական» ուղերձ հղել։