Հորմուզի նեղուցից գաղտնի միջանցքով օրական մոտ 10 մլն բարել նավթ դուրս է բերվում

ԱՄՆ զինված ուժերը Հորմուզի նեղուցով նավթի տեղափոխման համար գաղտնի նավագնացության միջանցք են ստեղծել։ Axios-ին հայտնել են ԱՄՆ երկու պաշտոնյաներ, որոնց խոսքով՝ գործողության շրջանակում վերջին շաբաթներին օրական 15-20 նավթատար նավ է անցնում նեղուցով՝ Օմանի ափի երկայնքով հարավային ուղիով։

Պաշտոնյաների տվյալներով՝ օրական մոտ 10 մլն բարել նավթ դուրս է բերվում Հորմուզի նեղուցից և մտնում համաշխարհային շուկա։ Որոշ օրերին այդ ծավալը հասել է 15-20 մլն բարելի։

ԱՄՆ զինուժը ոչ միայն ուղեկցում է նավթով բեռնված նավթատարներին, այլև կազմակերպում է դատարկ նավթատարների մուտքը Պարսից ծոց, որտեղ դրանք նավթ են բեռնում և հետ վերադառնում։ Նավերի շարժը համակարգվում է հատուկ աշխատանքային խմբի կողմից, իսկ ԱՄՆ ռազմաօդային ուժերի կործանիչները պաշտպանում են նավերը իրանական անօդաչու սարքերից և թևավոր հրթիռներից։

ԱՄՆ պաշտոնյաների խոսքով՝ գործողությունը հնարավոր է դարձել այն բանից հետո, երբ ԱՄՆ Կենտրոնական հրամանատարության ռազմական գործողությունները վնասել են Իրանի ռադարային և ծովային վերահսկման համակարգերը։

ԱՄՆ նախագահ Դոնալդ Թրամփը հայտարարել է, որ Հորմուզի նեղուցից ներկայում «հսկայական քանակությամբ նավթ է դուրս գալիս»։ Միաժամանակ նա նշել է, որ ԱՄՆ-ը այս պահին Իրանի հետ բանակցություններ չի վարում։