World Liberty Financial ընկերությունը համագործակցում է հոնկոնգյան WorldClaw ընկերության հետ

ԱՄՆ նախագահ Դոնալդ Թրամփի աջակցությամբ գործող World Liberty Financial ընկերությունը համագործակցում է հոնկոնգյան WorldClaw ընկերության հետ, որն իր հաճախորդներին հասանելիություն է տրամադրում նաև չինական տեխնոլոգիական ընկերությունների մշակած արհեստական բանականության մոդելներին. հայտնում է Reuters-ը՝ իր հետաքննության արդյունքների հիման վրա։

WorldClaw-ը հիմնադրվել է այս տարվա սկզբին և օգտատերերին հնարավորություն է տալիս մեկ հարթակի միջոցով օգտվել արհեստական բանականության տարբեր մոդելներից։ Որպես վճարման միջոց ընկերությունն ընդունում է նաև World Liberty-ի կրիպտոարժութային տոկենները։

Reuters-ի ուսումնասիրության համաձայն՝ WorldClaw-ի կայքում հասանելի մոտ 90 արհեստական բանականության մոդելներից 43-ը մշակվել են չինական Alibaba, Baidu, Z.ai և այլ տեխնոլոգիական ընկերությունների կողմից։ Թրամփի վարչակազմը նախկինում այդ ընկերություններից մի քանիսին դիտարկել է որպես ԱՄՆ ազգային անվտանգության համար սպառնալիք ներկայացնող։

WorldClaw-ը միաժամանակ առաջարկում է նաև ամերիկյան ընկերությունների, այդ թվում՝ OpenAI-ի և Anthropic-ի, մշակած տասնյակ մոդելներ։

Reuters-ը նշում է, որ World Liberty-ի և WorldClaw-ի համագործակցության կամ WorldClaw-ի՝ չինական ընկերությունների հետ գործարար հարաբերությունների մեջ որևէ ապօրինի գործողություն չի հայտնաբերվել։ Չինական ԱԲ մոդելները, որոնք հաճախ ավելի մատչելի են, վերջին շրջանում տարածվում են նաև ԱՄՆ տեխնոլոգիական ընկերությունների շրջանում։

Այնուամենայնիվ, չինական տեխնոլոգիաների և ազգային անվտանգության հարցերով յոթ փորձագետներ Reuters-ին ասել են, որ այս համագործակցությունը հակասում է Թրամփի վարչակազմի՝ չինական տեխնոլոգիական ընկերությունների նկատմամբ որդեգրած քաղաքականությանը։ Նրանց խոսքով՝ հատկապես խնդրահարույց է այն հանգամանքը, որ World Liberty-ի միջոցով Թրամփի ընտանիքը կարող է եկամուտ ստանալ այս գործունեությունից։

Թրամփի երկու ավագ որդիները հրապարակայնորեն գովազդել են WorldClaw-ը, իսկ World Liberty-ի ղեկավարներից մեկը նախկինում աշխատել է WorldClaw-ի խորհրդատու։

Սպիտակ տան մամուլի քարտուղար Աննա Քելլին հայտարարել է, որ World Liberty-ի և WorldClaw-ի հարաբերություններում «շահերի բախում չկա», և որ նախագահ Թրամփը գործում է «բացառապես ամերիկյան հանրության լավագույն շահերից ելնելով»։

World Liberty-ի ներկայացուցիչ Դևիդ Վաքսմանը նշել է, որ WorldClaw-ը անկախ ընկերություն է։ Նրա խոսքով՝ ամերիկյան խոշոր ընկերությունները արհեստական բանականության ոլորտում ծառայություններ են առաջարկում ինչպես չինական, այնպես էլ ամերիկյան տեխնոլոգիական ընկերությունների մոդելների հիման վրա, և դա «տարածված ու լայնորեն ընդունված մոտեցում է»։