Գյումրիում կասեցվել է գազավորված ըմպելիքների արտադրամասի գործունեությունը

Շիրակի մարզի Գյումրի քաղաքում կասեցվել է անհատ ձեռնարկատեր Հովսեփ Հակոբյանին պատկանող «Լենինականի» ապրանքանիշի ոչ ալկոհոլային գազավորված ըմպելիքների արտադրամասի արտադրական գործունեությունը։

Սննդամթերքի անվտանգության տեսչական մարմնի տեսուչների կողմից իրականացված վերահսկողության ընթացքում արտադրամասում հայտնաբերվել են սանիտարահիգիենիկ նորմերի մի շարք խախտումներ։

Մասնավորապես՝ արտադրամասի հատակների և պատերի մակերևույթները չեն եղել անջրանցիկ, լվացվող և ախտահանվող նյութերից։ Առաստաղները չեն համապատասխանել սահմանված պահանջներին՝ չեն կանխարգելել կեղտի կուտակումը, բորբոսի առաջացումը և մասնիկների թափվելու հնարավորությունը, ինչպես նաև նպաստել են խոնավության խտացմանը։

Արտադրամասը չի ունեցել սանհանգույց և անձնակազմի համար նախատեսված հանդերձարան։

Հայտնաբերված խախտումների հիմքով արտադրական գործունեությունը կասեցվել է։ Տնտեսվարողին տրվել են խախտումները վերացնելու պարտադիր կատարման հանձնարարականներ և սահմանվել է ժամկետ։