ԱՄՆ-ն Իրանում թիրախավորել է 90 ռազմական օբյեկտ
Միացյալ Նահանգների զինված ուժերը հայտարարել են, որ հուլիսի 8-ին նոր հարվածներ են հասցրել Իրանին՝ Հորմուզի նեղուցը նավագնացության համար բաց պահելու նպատակով։ Ամերիկյան հարվածներից հետո Իրանը պատասխան հարձակումներ է իրականացրել Քուվեյթի և Բահրեյնի ուղղությամբ։
ԱՄՆ զինված ուժերի Կենտրոնական հրամանատարությունից (CENTCOM) հայտնել են, որ իրենց հարվածները պատասխանն են եղել նախօրեին Հորմուզի նեղուցով անցնող երեք բեռնանավերի վրա իրականացված հարձակմանը։ Ուշագրավ է, որ այդ հարձակումները տեղի էին ունեցել ԱՄՆ նախագահ Դոնալդ Թրամփի հայտարարությունից մի քանի ժամ անց, երբ նա հայտարարել էր, որ Իրանի հետ ժամանակավոր հրադադարը, իր կարծիքով, «ավարտված է»։
«ԱՄՆ Կենտրոնական հրամանատարության ուժերը սկսել են լրացուցիչ հարվածներ հասցնել Իրանին՝ հետագա կերպով սահմանափակելու Հորմուզի նեղուցում նավագնացության ազատությանը սպառնալու նրա հնարավորությունները։ ԱՄՆ-ն պատասխանատվության է ենթարկում Իրանին միջազգային կարևոր ջրային ուղով ազատ տեղաշարժվող առևտրային նավերի և քաղաքացիական անձնակազմերի դեմ վերջին անհիմն ագրեսիայի համար»,- X-ում գրել է ԱՄՆ զինված ուժերի Մերձավոր Արևելքի հրամանատարությունը։
Հրամանատարությունից հայտնել են, որ վերջին հարվածների ընթացքում թիրախավորվել է Իրանի շուրջ 90 ռազմական օբյեկտ, այդ թվում՝ հակաօդային պաշտպանության համակարգեր, ափամերձ հսկողության միջոցներ, հրթիռների և անօդաչու թռչող սարքերի պահեստներ, ռազմածովային ուժերի ենթակառուցվածքներ, ինչպես նաև Իրանի ափամերձ գոտում գտնվող ռազմական լոգիստիկ ենթակառուցվածքներ։
Այս հարվածներից Իրանի որոշ հատվածներում դադարել է էլեկտրամատակարարումը։ Իրանական ԶԼՄ-ները հաղորդել են նաև զոհերի մասին։
Ի պատասխան՝ Իրանը երկրորդ օրն անընդմեջ հարձակումներ է իրականացրել Քուվեյթի և Բահրեյնի ուղղությամբ, որտեղ տեղակայված են ամերիկյան ռազմական բազաներ։
Քուվեյթի պաշտպանության նախարարությունը հայտնել է, որ որսում է հրթիռներ և անօդաչու թռչող սարքեր, իսկ Կատարը միառժամանակ հայտարարել էր «անվտանգության սպառնալիքի բարձր մակարդակ»։
«ԱՄՆ-ն դեռ չի հասկացել, որ ճնշումն ու սեփական պարտավորությունների խախտումն այլևս չեն մնում առանց հետևանքների։ Թող հստակ լինի. եթե դուք հարվածեք, պատասխան հարված կստանաք։ Հորմուզի նեղուցը կվերաբացվի միայն Իրանի կողմից սահմանված պայմաններով, այլ ոչ թե ԱՄՆ-ի սպառնալիքների ներքո»,- X-ում գրել է Իրանի գլխավոր բանակցող Մոհամմադ Բաղեր Ղալիբաֆը։
Թուրքիայում հուլիսի 8-ին անցկացվող ՆԱՏՕ-ի գագաթնաժողովից առաջ լրագրողների հարցին, թե արդյոք փոխըմբռնման հուշագիրն այլևս ուժի մեջ չէ, Թրամփը պատասխանել էր. «Շատ հետաքրքիր հարց է։ Իմ կարծիքով՝ այն ավարտված է։ Ես չեմ ցանկանում այլևս գործ ունենալ նրանց հետ»։
«Եթե մենք համաձայնագիր կնքենք Իրանի հետ, վստահ չեմ, որ այն կպահպանվի։ Իմ կարծիքով՝ նրանք շատ անազնիվ մարդիկ են»,- ավելի ուշ հավելել էր Թրամփը։ Նա հավելել էր, որ չի կարծում, թե պատերազմը կվերսկսվի․ «Ինչ էլ տեղի ունենա, շատ արագ կավարտվի... և միայն կբարձրացնի անվտանգությունը, այդ թվում՝ նավթի մատակարարումների համար»։
Մեռելոց օրերը կամրագրվեն օրենքով սահմանված տոների և հիշատակի օրերի ցանկում, իսկ ոչ աշխատանքային լինե...
Առաջին դասարանցիների առցանց ընդունելությունը՝ նոր կանոններ, նոր մարտահրավերներ
Ֆրանսիայում հրշեջները պայքարում են անտառային հրդեհների դեմ
Ես քաղաքականությունից չեմ հեռանալու, քաղաքականության էջը չեմ փակում. Ալեն Սիմոնյան
Մահացել է ՀՀ վաստակավոր արտիստ Արտաշես Ալեքսանյանը
Ճապոնիայի վարչապետն այցելել է Հնդկաստան
Չեմ վերցնի մանդատ. Ալեն Սիմոնյան
Ինչո՞ւ է շոգին գլխացավն ավելի հաճախ լինում․ բժիշկը ներկայացնում է հիմնական պատճառներն ու խորհուրդներ...
Շվեդիայում Ռուսաստանի դեսպանությունը ԱԹՍ-ներով հարձակման է ենթարկվել
«Ուժեղ Հայաստան»-ը կվերցնի մանդատները և կգնա Ազգային ժողով