Երբ ֆուտբոլը միայն սպորտ չէ. ոչ մարզական կրքեր` Գերմանիայում

Գերմանիայում շատ ծանր են տանում իրենց հավաքականի պարտությունը ֆուտբոլի աշխարհի առաջնությունում։ Երկուշաբթի աշխարհի քառակի չեմպիոն եւ Պարագվայի հետ խաղի անվիճելի ֆավորիտ համարվող Գերմանիան պարտվեց  3։4 հաշվով (հետխաղային 11-մետրանոցներով) ու դուրս եկավ հետագա պայքարից։

Մինչ այդ Գերմանիան աշխարհի առաջնություններում 11-մետրանոցների շարքում չէր իրացրել ընդամենը մեկ հարված՝ 1982 թվականի առաջնությունում։

Ֆուտբոլի ազգային ընտրանին այս պարտությանը X-ի իր էջում արձագանքեց ընդամենը մեկ բառով՝ «Վերջ», որին կցված էր կոտրված սրտի էմոջի, գրում է BBC-ին։

Սակայն Գերմանիայի կանցլեր Ֆրիդրիխ Մերցը բոլորովին այլ գնահատական տվեց տեղի ունեցածին ու, ըստ էության, քաղաքական բանավեճի հիմք տվեց։

«Թեեւ սա շատ ցավալի էր դուրս մնալը, բայց ի՜նչ խաղ էր, @DFB_Team։ Այս աշխարհի առաջնությունում ձեր նվիրումն ու թիմային ոգին ոգեշնչեցին մեր երկրին։ Մենք հպարտանում ենք ձեզնով»,- գրել էր նա X սոցիալական ցանցում։

Նրա հասցեին կոշտ մեկնաբանությունները երկար սպասեցնել չտվեցին։

Bild-ի սյունակագիր Մարիոն Հորնը նրա գրառումն անվանեց «աղետ», իսկ պարտությունը՝ «ջախջախիչ ձախողում»։

«Աշխարհի առաջնությունում Պարագվայից կրած դաժան պարտությունը, մարզիչը, աշխատանքի նկատմամբ վերաբերմունքն ու գերմանացի ֆուտբոլիստների խաղը մեր ամբողջ երկրի վիճակի ախտանշաններն են։ Լավագույն դեպքում մենք դարձել ենք երկրորդ կարգի երկիր։ Մեր տնտեսությունն աննախադեպ անկում է ապրում. գրեթե ամեն օր գրանցվում են սնանկացումներ եւ ապարդյունաբերականացում։ Իսկ գերմանական ֆուտբոլն այսօր գոյատեւում է բացառապես իր նախկին հեղինակության հաշվին»։

Ավելին, Մերցի ոգեշնչման մասին խոսքերը նա, ըստ էության, սուտ է որակել։

 «Պարոն կանցլեր, դա պարզապես ճիշտ չէ։ Ես համաձայն չեմ հաշտվել երկրորդ կարգի լինելու հետ։ Ես հպարտ չեմ։ Ես զայրացած եմ։ Ես հիասթափված եմ։ Ես կատաղած եմ։ Մեր երեխաները Գերմանիան ճանաչում են միայն որպես պարտվող»,- հայտարարել է սյունակագիրը։

Welt-ի մեկնաբան Ուլֆ Պոշարդտը իր հոդվածն ուղղակի վերնագրել է. «Միայն հաջողակ Գերմանիան է արժանի, որ այնտեղ ապրեն»։

«Գերմանիան կրկին վաղ փուլում դուրս է մնում աշխարհի առաջնությունից, իսկ կանցլերը դեռ շնորհավորում է այս խղճուկ թիմին՝ ասելով. «Մենք հպարտանում ենք ձեզնով»։ Ո՛չ, չենք հպարտանում։ Ընդհակառակը»,- գրել է Պոշարդտը։

Kicker մարզական պարբերականը արդյունքը բնութագրել է որպես «մահապատիժ գերմանական ֆուտբոլի եւ հավաքականի գլխավոր մարզիչ Յուլիան Նագելսմանի համար»։

Լրագրողների զայրույթը կիսում են նաեւ քաղաքական գործիչները։

 «Նույնիսկ չգիտեմ, թե որն էր ավելի վատ՝ խա՞ղը, թե՞ այս վերլուծությունը»,- ասել է  Ազատ դեմոկրատական կուսակցության ներկայացուցիչ Մարի-Ագնես Շտրակ-Ցիմերմանը։

 «Թվում է՝ կանցլերը բոլորովին այլ խաղ է դիտել։ Սա հերթական անգամ ցույց է տալիս, թե որքան է նրա իրականության ընկալումը տարբերվում իրականությունից»,- WELT-ին տված հարցազրույցում ասել է Բունդեսթագում Ձախ կուսակցության խմբակցության անդամ Քրիստիան Գյորկեն։

«Այս թվիթից հետո հարց է առաջանում՝ որն էր ավելի ցավոտ՝ երեկվա հավաքականի խա՞ղը, թե՞  դաշնային կանցլերի այս գնահատականը»,- գերմանական մամուլին ասել է իշխող ՔԴՄ կուսակցության դաշնային վարչության անանուն անդամներից մեկը։

Մեկնաբանություններն ու հասարակական ճնշումն այնքան մեծ էր, որ կանցլեր Մերցն իր առաջին թվիթից 11 ժամ հետո երկրորդն է անում։

«Հաղթանակները մենք միասին ենք տոնում։ Եվ պարտության պահին էլ միասին ենք մնում։ Հենց դա է մեզ ուժեղ դարձնում։ Նա, ով կրծքին կրում է արծիվը, արժանի է մեր աջակցությանը, ոչ թե ծաղրանքին»,- հայտարարել է կանցլերը։

Մեկնաբանների կարծիքով՝ ֆուտբոլի շուրջ ծագած այս սկանդալը վկայում է

Սկանդալը բռնկվել է չորեքշաբթի նախատեսված կոալիցիոն կոմիտեի նիստի նախօրեին։

Գերմանական թերթերի գնահատմամբ՝ այսօրվա հանդիպումը առանցքային քաղաքական նշանակություն ունի թե՛ մի շարք բարեփոխումների, թե՛ Մերցի կառավարության հետագա ճակատագրի համար։

armradio.am