Ինտենսիվ այգեգործության զարգացման ծրագրի շահառուներին մայր գումարի մարման արտոնյալ ժամկետ կտրամադրվի

Առաջարկվում է, որ ինտենսիվ այգեգործության զարգացման պետական աջակցության ծրագրի շրջանակում նախարարության կողմից սահմանված կարգով մինչև 2026 թվականն իրականացված մոնիտորինգի արդյունքների հիման վրա այգեհիմնում իրականացրած այն շահառուները, որոնց վարկի մայր գումարի արտոնյալ ժամկետը արդեն իսկ լրացել է կամ կլրանա մինչև 2027 թվականի հուլիսի 31-ը, ֆինանսական կառույցի կողմից վարկի մարման ժամկետը կերկարաձգվի 1 տարով և կտրամադրվի 1 տարի ժամկետով վարկի մայր գումարի լրացուցիչ արտոնյալ ժամկետ:

Այդ մասին որոշման նախագիծը Կառավարության՝ հունիսի 25-ի նիստին ներկայացրեց էկոնոմիկայի նախարար Գևորգ Պապոյանը՝ նշելով, որ սա կապված է այն սահամանափակումների հետ, որոնց բախվել են ՀՀ պտուղ-բանջարեղեն արտահանողները դեպի ռուսական շուկա ապրանքն արտահանելիս:

Պապոյանը հիշեցրեց, որ նախորդով նմանատիպ ծրագիր է ընդունվել նաև ջերմատների համար: Այդ դեպքում 6 ամիս ժամկետ էր սահմանվել, այս դեպքում՝ 1 տարի, քանի որ ջերմատների դեպքում բերքը պարբերաբար է ստացվում, իսկ այս դեպքում՝ 1 անգամ:

Նշված արտոնությունից օգտվելու նպատակով շահառուն պետք է համապատասխան փաստաթղթերով դիմումը ներկայացնի մինչև 2026 թվականի սեպտեմբերի 1-ը:

Վարչապետ Նիկոլ Փաշինյանն արձագանքեց՝ ստացվում է՝ ինտենսիվ այգիների սեփականատերերը, որոնք վարկ ունեն, և որոնց վարկի արտոնյալ ժամկետը սպառվել է, ստանում են լրացուցիչ արտոնյալ ժամկետ: Արտոնյալ ժամկետ՝ նշանակում է, որ գումարը վերցնում, օգտագործում են, բայց ո՛չ տոկոս են տալիս, ո՛չ մայր գումար. «Այսինքն՝ գումարը կունենան, կօգտագործեն, բայց տոկոս, մայր գումար չեն փակի, իսկ սպասարկման հարցում կաջակցի Կառավարությունը»: