Մոսկվայի մարզի նահանգապետ Անդրեյ Վորոբյովը հայտնել է, որ մայրաքաղաքի վրա իրականացված զանգվածային հարձակման ժամանակ Ժուկովսկի քաղաքի Գագարինի փողոցում անօդաչու սարքը հարվածել է բազմաբնակարան շենքի։ Նախնական տվյալներով՝ տուժածներ չկան, բնակիչները տարհանվում են։ Լյուբերցիում դրոնի բեկորները վնասել են ֆիթնես կենտրոնն ու արդյունաբերական գոտում գտնվող մի օբյեկտ։ Բացի այդ, հրդեհ է բռնկվել «Բելայա Դաչա» առևտրի կենտրոնի տանիքում։ Էլեկտրոստալի մոտակայքում անօդաչուի կտորները վնասել են առանձնատուն, ինչի հետևանքով մի կին է վիրավորվել, իսկ բուն քաղաքում մեքենա է այրվել։ Չեխովի շրջանի Մասնովո-Ժուկովո գյուղում դրոնն ընկել է ամառանոցի վրա և ամբողջությամբ ավերել այն․ այստեղ ևս տուժածներ չկան։ Միևնույն ժամանակ, անցած գիշեր շուրջ 60 դրոն է հարձակվել Ռոստովի մարզի վրա։ Նահանգապետ Յուրի Սլյուսարը հայտնել է, որ Գուկովո քաղաքին հասցված հարվածի հետևանքով մեկ մարդ զոհվել է, ևս երկուսը՝ վիրավորվել։ Ըստ նրա տվյալների՝ «առևտրային երկու օբյեկտում հրդեհ է բռնկվել»։ Սակայն, ինչպես պարզել է «Astra» լրատվականը՝ հիմնվելով ականատեսների լուսանկարների վրա, քաղաքում իրականում այրվում է ութ ջրամբար ունեցող նավթաբազան։

Դրանից առաջ ուկրաինական անօդաչուները Մոսկվայի նավթավերամշակման գործարանին հարվածել էին հունիսի 16-ին։ «Reuters»-ի տվյալներով՝ այդ հարձակումից հետո «Գազպրոմ նեֆտ»-ին պատկանող գործարանի աշխատանքը դադարեցվել էր, և հումքի վերամշակումն ամբողջությամբ կանգ էր առել։ Միևնույն ժամանակ, գործակալության աղբյուրներից մեկը նշել էր, որ ձեռնարկությունը նախատեսում են վերագործարկել առաջիկա մի քանի օրվա ընթացքում՝ ավելի ցածր հզորությամբ։

«Energy Intelligence»-ի վերլուծաբանների հաշվարկներով՝ հունիսի սկզբին նավթավերամշակման գործարաններին հասցված ուկրաինական դրոնների պարբերական հարվածների հետևանքով Ռուսաստանում նավթավերամշակման ծավալները նվազել են օրական 4 միլիոն բարելից ցածր, ինչը վերջին 21 տարվա ամենացածր ցուցանիշն է։ Ըստ նրանց տվյալների՝ այս պահին պարապուրդի է մատնված ռուսական նավթավերամշակման հզորությունների գրեթե մեկ երրորդը՝ օրական 2,14 միլիոն բարել։ «Ռուսաստանի էներգետիկ հատվածի դեմ Ուկրաինայի արշավը հսկայական վնաս է հասցրել, ինչի հետևանքով երկիրը գնում է դեպի իր պատմության վատթարագույն վառելիքային ճգնաժամը»,- եզրակացրել են վերլուծաբանները։