Ալեքսանդր Արզումանյանը, շահումը եւ Լենինը

Մարդու իրավունքների եվրոպական դատարանը հրապարակել է «Արզումանյանն ընդդեմ Հայաստանի» գործով վճիռը, որով պարտավորեցրել է Հայաստանի իշխանություններին 2500 եվրո վճարել հայցվորին, որից 2000-ը՝ որպես ոչ նյութական վնասի փոխհատուցում, եւ 500-ը՝ որպես փոխհատուցում ծախսերի համար: Այդ մասին հայտնում է ՄԻԵԴ-ի կայքը: Իսկ Արզումանյանը Դանիայում Հայաստանի դեսպան Ալեքսանդր Արզումանյանն է:

Ալեքսանդր Արզումանյանը պահանջել էր 81.250 եվրո՝ որպես ոչ նյութական վնասի փոխհատուցում: Այսուհանդերձ նրան տվել են ոչ թե 81 հազար 250 եվրո, այլ 2,5 հազար:

Դժվար է ասել, թե այս որոշումն Արզումանյանին ուրախացրել է, թե ոչ: Եթե նա հարցին մոտենա որպես բողոք ներկայացնող Արզումանյան, ապա հաստատ լավ տրամադրություն չի ունենա. որտեղ 81 հազարը, որտեղ 2 հազարը:

Եթե նա հարցին մոտենա որպես դեսպան Արզումանյան, ապա պետք է որ ուրախ լինի, քանի որ իր կողմից ներկայացվող երկիրը 81-ի փոխարեն ընդամենը 2.5 հազար եվրո պետք է վճարի Արզումանյանին, բայց երբ նա գիտակցի, որ այդ Արզումանյանն ինքն է, ապա կրկին տրամադրությունը կընկնի:

Մյուս կողմից, հիմա ուրախ է, թե տխուր, մի շատ կարեւոր խնդիր է առաջացել. վերցնելո՞ւ է նա գումարը, թե ոչ: Այստեղ հիշենք մի պատմություն, որն, ասում են, ժամանակին պատահել է բոլշեւիկյան հեղափոխության առաջնորդ Վլադիմիր Լենինի հետ:

Աշխատանքից տուն գնալիս նա վիճակախաղի տոմս է գնում: Նայում է կրպակում նստած տատիկին, խղճում է նրան եւ մի տոմս գնում: Տանը ստուգում են եւ շահում բավական մեծ գումար, որը համարժեք է այսօրվա 2,5 հազար եվրոյին:

Կինը՝ Նադեժդան նրան ասում է, թե երբ ես պատրաստվում վերցնել գումարը: Այստեղ մեծ հեղափոխականն այլայլվում է, գոռգռում, ասում, թե ինչպես կարող է ինքը վերցնել այդ գումարը, երբ ժողովրդի ութսուն տոկոսն աղքատության մեջ է:

Նա շատ սկզբունքային էր: Այդպես էլ գումարի հետեւից չգնաց: Նա ուղարկեց կնոջը՝ Նադեժդային: Այո, սկզբունքային մարդ էր Լենինը: Իսկ որքա՞ն սկզբունքային կլինի դեսպան Արզումանյանը:

Կարծում ենք, նա եւս գումարը չի վերցնի: Ինչպես վերցնի, երբ այդ երկրի դեսպանն է: Նրան ճանաչողները պնդում են, որ նա չի վերցնի գումարը, այլ կխնդրի փոխանցել իր քարտային հաշվի վրա: Ոմանք էլ պնդում են, որ նա այդ գումարը մեծ աղմուկով կփոխանցի «Հայաստան» համահայկական հիմնադրամին կամ պետական բյուջե:

Իսկ պատկերացնում եք, թե ինչ կմտածեն Դանիայում Հայաստանի մասին, եթե հանկարծ իմանան այս մասին: Հաստատ կգտնվի գոնե մի դանիացի, որը Ալիկ Արզումանյանին տեսնելիս նրան կասի. «Ձեզ նմաններ խայտառակում են ռեսպուբլիկան: Ձեզ նմաններ չեն կարող դեսպան լինել»:

Մի խոսքով, հասարակությունը սպասում է Ալեքսանդր Արզումանյանի որոշմանը: Բնականաբար, ոմանք կասեն, թե ինչ հասարակություն, բայց ամեն դեպքում՝ սպասողներ դեռ կան:

Բարոյական տեսանկյունից Արզումանյանը պետք է որ հրաժարական տա, իսկ պետության տեսանկյունից՝ Սերժ Սարգսյանը նրան պետք է պաշտոնանկ անի: Սա է իրականությունը:

Րաֆֆի Նալբանդյան

Top-News.am