«Ամերիկացի բանակցողների առաջարկները անցնում են շրջանցիկ դիվանագիտական ճանապարհով, հաճախ իրանական կողմից սուրհանդակների մասնակցությամբ՝ Մոջթաբա Խամենեիի գտնվելու վայրը թաքցնելու նպատակով»,- փոխանցում է գործակալությունը։

Աղբյուրների խոսքով՝ ԱՄՆ-ի և Իրանի միջև շփումը ավելի քիչ է հիշեցնում բանակցություններ, քան ծանրաբեռնող գործընթաց, որի շրջանակում հաղորդագրությունների փոխանակումը կարող է տևել մի քանի օր։

«Իրանում պատերազմի ընթացքում անկայուն ինտերնետ կապը բարդացրել է գործը. երբեմն WhatsApp-ով հաղորդագրությունների առաքումը տևում էր մինչև 48 ժամ»,- նշում է Bloomberg-ը։

Աղբյուրների տեղեկություններով՝ մինչև սուրհանդակներին փոխանցվելը Վաշինգտոնի հաղորդագրությունները անցնում են պակիստանցի պաշտոնյաների միջոցով, որոնք դրանք փոխանցում են Թեհրան հեռախոսով և անձնական այցերի ընթացքում։ ԱՄՆ նախագահ Դոնալդ Թրամփի վարչակազմի բարձրաստիճան պաշտոնյայի կարծիքով՝ նույնիսկ եթե ԱՄՆ-ն համաձայնվեր Իրանի բոլոր պահանջներին, համաձայնագրի ստորագրումը կտևեր հինգ օր։

Գործակալության զրուցակիցների խոսքով՝ ԱՄՆ նախագահի հատուկ բանագնաց Սթիվ Ուիտկոֆը ուղիղ կապի ալիք է պահպանում Իրանի ԱԳ նախարար Աբբաս Արաղչիի հետ, որից ԱՄՆ-ն հաճախ է օգտվել։

Բացի այդ, Bloomberg-ի տվյալներով՝ ԱՄԷ-ն որոշել է հակամարտության սկզբից ի վեր անցկացնել Իրանի ներկայացուցիչների հետ առաջին անձնական հանդիպումը, այդ թվում բանակցությունների դանդաղ ընթացքից դժգոհության պատճառով։

Հինգշաբթի Bloomberg-ը փոխանցել էր, որ ԱՄԷ-ի և Իրանի ազգային անվտանգության մարմինների պաշտոնյաները այս շաբաթ անցկացրել են Իրանի դեմ ռազմական գործողության մեկնարկից ի վեր առաջին անձնական հանդիպումը՝ կողմերի միջև լարվածությունը նվազեցնելու համար։

ԱՄՆ-ի և Իսրայելի հարձակումից, ինչպես նաև երկրի ղեկավարության դեմ դիվերսիաների շարքից հետո Իրանի իշխանությունները անվտանգության նկատառումներով սահմանափակել են օտարերկրյա կայքերի և մեսենջերների հասանելիությունը։ Ինչպես ավելի վաղ հաղորդել էր գործակալության թղթակիցը, երեքշաբթի Թեհրանում միջազգային ինտերնետի հասանելիությունը մասամբ վերականգնվել էր։