Իսպանիա կատարած իր այցի ընթացքում Հռոմի կաթոլիկ եկեղեցու առաջնորդը նաև պատարագ է մատուցել Բարսելոնայի հանրահայտ տաճարում, որի շինարարությունը շարունակվում է արդեն ավելի քան 100 տարի և շուտով պետք է ավարտվի։

Խաչը ներառյալ՝ Հիսուս Քրիստոսի աշտարակի՝ տաճարի ամենաբարձր կետի բարձրությունը կազմում է 172,5 մետր։ Սա Սագրադա Ֆամիլիային դարձնում է աշխարհի ամենաբարձր եկեղեցին։

Սուրբ ընտանիքի տաճարի առաջին քարը դրվել է 1882 թվականին, իսկ հաջորդ տարի դրա շինարարությունը գլխավորել է այն ժամանակ դեռ երիտասարդ ճարտարապետ Անտոնիո Գաուդին։

Տաճարում պատարագը տեղի է ունեցել ճիշտ Գաուդիի մահվանից 100 տարի անց, որի համար Սագրադա Ֆամիլիան դարձել էր կյանքի գլխավոր նախագիծը։

Գաուդիի մահվան պահին՝ 1926 թվականին, նրա ծրագրած 18 աշտարակներից կառուցված էր միայն մեկը։

Հաջորդ տարիներին տաճարը աստիճանաբար ավարտակառուցվել է, և գործընթացը ղեկավարել է Սագրադա Ֆամիլիա հիմնադրամը, որը միջոցներ է ստանում տոմսերի վաճառքից և մասնավոր նվիրատուներից։

Կառուցողները կշարունակեն աշխատել տաճարի ավարտին հաջորդ տասնամյակի ընթացքում․ մասնավորապես, նրանք կստեղծեն նոր դեկորատիվ տարրեր և քանդակներ, ինչպես նաև սանդուղք կկառուցեն դեպի կառույցի գլխավոր մուտքը։