Հայաստանի պատվիրակությունը մասնակցել է ՄԱԿ-ի հանցավորության կանխարգելման և քրեական արդարադատության հանձնաժողովի նստաշրջանին

ՆԳ նախարարի տեղակալ Արմեն Մկրտչյանի գլխավորած պատվիրակությունը մայիսի 31-ից հունիսի 3-ը մասնակցել է Վիեննայում անցկացված ՄԱԿ-ի հանցավորության կանխարգելման և քրեական արդարադատության հանձնաժողովի 35-րդ նստաշրջանին։ Այդ մասին հայտնում են ՆԳՆ-ից: Պատվիրակության կազմում էին Ավստրիայում ՀՀ արտակարգ և լիազոր դեսպան Անդրանիկ Հովհաննիսյանը, ՆԳ նախարարի խորհրդական Արթուր Խուդինյանը, ՆԳ և Արդարադատության նախարարությունների ներկայացուցիչներ։

Քննարկվել են հանցավորության կանխարգելման և քրեական արդարադատության հանձնաժողովի կազմում Հայաստանի Հանրապետության՝ երրորդ անգամ վերընտրվելու, ինչպես նաև ՀՀ քրեական արդարադատության համակարգի արդիականացման, կազմակերպված հանցավորության և կոռուպցիայի դեմ պայքարի գործիքակազմի կատարելագործմանն առնչվող հարցեր։

Արմեն Մկրտչյանն ընդգծել է, որ վերջին տարիներին Հայաստանում իրականացվել են համապարփակ և համակարգային բարեփոխումներ՝ ուղղված արդարադատության մատչելիության ընդլայնմանը, քրեական արդարադատության համակարգի անկախության, թափանցիկության և արդյունավետության ամրապնդմանը, կազմակերպված հանցավորության և կոռուպցիայի դեմ պայքարի մեխանիզմների կատարելագործմանը, ինչպես նաև թվային և կիբեռհանցավորության դեմ պայքարի կարողությունների զարգացմանը։

Նրա խոսքով՝ իրականացված քայլերը նպաստել են նաև իրավապահ մարմինների հաշվետվողականության և հանրային վստահության բարձրացմանը։

Նախարարի տեղակալը ներկայացրել է նաև Ներքին գործերի նախարարության ինստիտուցիոնալ բարեփոխումների ընթացքը՝ նշելով, որ Ոստիկանության, Փրկարար ծառայության և Միգրացիայի ու քաղաքացիության ծառայության միավորումը նախարարության միասնական կառավարման շրջանակում հնարավորություն է տվել ձևավորել առավել համակարգված և արդյունավետ կառավարման մոդել՝ միաժամանակ ամրապնդելով խորհրդարանական և քաղաքացիական վերահսկողության մեխանիզմները։

Նա անդրադարձել է նաև ոստիկանության կառավարման նոր մոդելին, որը հիմնված է Պարեկային ծառայության, Քրեական ոստիկանության, Համայնքային ոստիկանության և Ոստիկանության գվարդիայի գործունեության վրա, ինչի արդյունքում զգալիորեն բարելավվել է արձագանքման արդյունավետությունը։

Արմեն Մկրտչյանը նշել է, որ ՆԳ նախարարությունը վերջին տարիներին էականորեն ակտիվացրել է կիբեռհանցագործությունների դեմ պայքարը՝ ձևավորելով մասնագիտացված ստորաբաժանում՝ միտված իրավապահ կարողությունների զարգացմանն ու հանցավորության արդյունավետ կանխարգելմանը։

Միաժամանակ, Քրեական ոստիկանությունն ընդլայնել է թմրամիջոցների ապօրինի շրջանառությամբ զբաղվող կազմակերպված հանցավոր խմբերի դեմ իրականացվող միջոցառումները՝ առանձնահատուկ ուշադրություն դարձնելով մատակարարման շղթաների բացահայտմանը, ինչպես նաև թմրամիջոցների առցանց տարածման ուղիների դեմ պայքարին։ Արդյունքում, նախորդ տարիների համեմատ արձանագրվել է թմրամիջոցների առգրավումների ծավալների զգալի աճ։

Կարևորվել է նաև Հայաստանում անկախ հակակոռուպցիոն ինստիտուցիոնալ համակարգի ձևավորումը, բարեվարքության ստուգման և համապարփակ վեթինգի մեխանիզմների ներդրումը։

Միաժամանակ նշվել է, որ ժամանակակից թվային լուծումների և էլեկտրոնային արդարադատության գործիքների կիրառումը նպաստել է դատական գործերի կուտակումների էական կրճատմանը՝ բարձրացնելով արդարադատության մատչելիությունն ու արդյունավետությունը։

Արմեն Մկրտչյանն ընդգծել է, որ Հայաստանն ակտիվորեն վերափոխում է քրեակատարողական համակարգը՝ անցում կատարելով վերականգնողական և վերասոցիալականացմանն ուղղված մոդելի։