Հայաստանը խորացնում է ռազմական համագործակցությունը Հնդկաստանի հետ. The Economic Times

The Economic Times-ը հոդված է հրապարակել Հայաստանի և Հնդկաստանի միջև խորացող պաշտպանական համագործակցության վերաբերյալ։ Radar Armenia-ն ներկայացրել է հոդվածը՝ մասնակի կրճատումներով.

«Հայաստանը շարունակում է ընդլայնել պաշտպանական համագործակցությունը Հնդկաստանի հետ՝ նպատակ ունենալով հակազդել Ադրբեջանի կողմից աճող անվտանգային սպառնալիքներին, որոնք, ըստ հրապարակման, աջակցություն են ստանում նաև Պակիստանից և Թուրքիայից։ Այս գործընթացը տեղի է ունենում այն պայմաններում, երբ Երևանն ու Նյու Դելին ակտիվացնում են ռազմական կապերը՝ ուսումնական ծրագրերի, բարձրաստիճան փոխայցելությունների և սպառազինության ձեռքբերման համաձայնագրերի միջոցով։

Հայկական բանակի երեք բարձրաստիճան ներկայացուցիչներից կազմված պատվիրակությունը վերջերս այցելել է Հնդկաստանի Մահարաշտրա նահանգի Նաշիկ քաղաքում գործող Հրետանային դպրոց։ Այցի ընթացքում հայկական կողմին ներկայացվել են ուսումնական ծրագրերը, կիրառվող օպերատիվ մեթոդներն ու ժամանակակից հրետանային կարողությունները։ Պատվիրակությունը հետևել է նաև կենդանի հրաձգության վարժանքների։

Ավելի վաղ՝ անցյալ ամիս, Դելիում հանդիպում է տեղի ունեցել Հայաստանի պաշտպանության նախարարի առաջին տեղակալ, Գլխավոր շտաբի պետ, գեներալ-լեյտենանտ Էդվարդ Ասրյանի և Հնդկաստանի ռազմական բարձրագույն ղեկավարության միջև։ Քննարկումներին մասնակցել են Հնդկաստանի պաշտպանության շտաբի պետ գեներալ Անիլ Չաուհանը, ցամաքային զորքերի շտաբի պետ գեներալ Ուպենդրա Դվիվեդին, ռազմաօդային ուժերի մարշալ Ա. Պ. Սինգհը և պաշտպանության քարտուղար Ռաջեշ Կումար Սինգհը։

2026 թվականի փետրվարին գեներալ Անիլ Չաուհանը այցելել է Երևան՝ երկկողմ պաշտպանական համագործակցությունն ամրապնդելու նպատակով։ Այցի շրջանակում նա մասնակցել է պաշտպանական հետազոտական կենտրոնների բացմանը և ընդգծել ժամանակակից պատերազմների պայմաններում համատեղ ուսուցման և փորձի փոխանակման կարևորությունը։

Հոդվածում նշվում է, որ Հնդկաստանի դերը Հայաստանի համար գնալով ավելի է կարևորվում՝ հատկապես այն ֆոնին, երբ Ռուսաստանը նվազեցրել է ռազմական մատակարարումները՝ Ուկրաինայում շարունակվող պատերազմի հետևանքով։

Հայաստանն ու Ադրբեջանը 2020 և 2023 թվականներին ներգրավված են եղել երկու խոշոր ռազմական բախումներում։ Ըստ հրապարակման՝ այդ հակամարտությունների ընթացքում ադրբեջանական բանակը կիրառել է թուրքական արտադրության զինտեխնիկա։ Բացի այդ, Ադրբեջանը խորացնում է ռազմական համագործակցությունը Պակիստանի հետ, որը պայմանագիր է կնքել 40 միավոր JF-17 Block III կործանիչների ձեռքբերման վերաբերյալ։ Այս հանգամանքները Հայաստանին մղել են նոր պաշտպանական գործընկերներ և ավելի հուսալի սպառազինության համակարգեր որոնելու ուղղությամբ։

2020 թվականից ի վեր Հայաստանը Հնդկաստանի հետ կնքել է շուրջ 2 միլիարդ դոլարի պաշտպանական համաձայնագրեր։ Դրանք ներառում են մի շարք ժամանակակից սպառազինություններ, որոնք ուղղված են հակաօդային պաշտպանության, մարտադաշտային վերահսկողության և հրթիռային հարվածային կարողությունների ամրապնդմանը։

Այդ համակարգերից է «Ակաշ» հակաօդային պաշտպանության համալիրը, որը նախատեսված է կործանիչների, ուղղաթիռների և անօդաչու թռչող սարքերի խոցման համար։ Համակարգն ապահովում է միջին հեռահարության պաշտպանություն, ունի ռադարային ուղղորդման հնարավորություն և կարող է միաժամանակ խոցել մի քանի թիրախ։ 2022 թվականին Հայաստանը դարձավ «Ակաշ» հրթիռային համակարգի առաջին արտասահմանյան գնորդը՝ Հնդկաստանի հետ կնքելով շուրջ 720 միլիոն դոլարի պայմանագիր։

Հայաստանը ձեռք է բերում նաև «Պինակա» համազարկային կրակի ռեակտիվ համակարգեր, որոնք նախատեսված են մեծ տարածության վրա արագ և ինտենսիվ կրակ վարելու համար։ Համակարգը հնարավորություն է տալիս ճշգրիտ հարվածներ հասցնել հակառակորդի դիրքերին, ենթակառուցվածքներին և զորքերի կուտակումներին՝ ապահովելով բարձր շարժունակություն և արագ տեղակայում մարտական պայմաններում։

«Սվաթի» ռադարային համակարգը նախատեսված է հակառակորդի հրետանային և ականանետային կրակի հայտնաբերման և հետևման համար։ Այն հնարավորություն է տալիս որոշել թշնամական կրակի արձակման կետը՝ ապահովելով արագ հակահարվածի իրականացում։ Համակարգը զգալիորեն բարձրացնում է մարտադաշտում իրավիճակային իրազեկվածությունն ու արձագանքման արագությունը։

Հնդկաստանը Հայաստանին մատակարարել է նաև առաջադեմ հակադրոնային տեխնոլոգիաներ, որոնք նախատեսված են անօդաչու թռչող սարքերի հայտնաբերման, հետևման և վնասազերծման համար։ Այս համակարգերը միտված են պաշտպանելու ռազմավարական ենթակառուցվածքներն ու ռազմական օբյեկտները հետախուզական և հարձակողական դրոններից։

«Ակաշ» հակաօդային պաշտպանության համակարգերի մատակարարումները սկսվել են 2024 թվականին՝ էապես մեծացնելով Հայաստանի կարողությունները օդային և հրթիռային սպառնալիքներին հակազդելու գործում։ Հայաստանը շարունակում է ընդլայնել համագործակցությունը Հնդկաստանի հետ պաշտպանական ուսուցման, սպառազինության ձեռքբերման և հնարավոր համատեղ արտադրության ուղղություններով՝ ամրապնդելով Նյու Դելիի դերը Հարավային Կովկասի ռազմավարական հավասարակշռության մեջ։