Ստուգվում են ոչ միայն ջերմատները, այլև ձկնաբուծարանները․ ռուս մասնագետները Հայաստանում են

Սննդամթերքի անվտանգության տեսչական մարմինը պաշտոնական գրություն ստացել է․ ծաղիկների արտահանումը Ռուսաստան կարգելվի։ Տեսչական մարմնի իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը «Ռադիոլուր»-ին հայտնել է, որ հայկական կողմի հրավերով ՌԴ անասնաբուժական և բուսասանիտարական վերահսկողության դաշնային ծառայության ներկայացուցիչներն ու հայ մասնագետները համատեղ ստուգումներ կանցկացնեն բուսական և կենդանական ծագման ապրանք արտադրող հայկական մի շարք ընկերություններում։ Ստուգումների նպատակն է՝ պարզել Հայաստանից Ռուսաստան արտահանվող բուսասանիտարական և ձկնաբուծական ենթահսկման արտադրանքի համապատասխանությունը ԵԱՏՄ օրենսդրության պահանջներին և նորմերին։

Սննդամթերքի անվտանգության տեսչական մարմնի հրավերով Հայաստանում են ռուսաստանցի մի խումբ մասնագետներ։ Տեսչական մարմնի իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը «Ռադիոլուր»-ին ներկայացնում է այցի նպատակը․

«Ռոսսելխոզնադզորի հետ բանակցություններից  հետո մեր հրավերով ներկայացուցիչները  այս պահին  Հայաստանում են։ Ութ ընկերությունում համատեղ ստուգումներ ենք անցկացնում։ Երբ դրանք ավարտվեն, կտեղեկացնենք»։

Վերջին շրջանում որոշ հայ տնտեսվարողների համար խնդիրներ են առաջացել ռուսական շուկայում։ Խոսքը մասնավորապես ծաղկի արտահանման մասին է։ Մ

«2026 թվականի մայիսի 22-ից Ռոսսելխոզնադզորը ժամանակավոր սահմանափակումներ է մտցնում Հայաստանից ծագող և մատակարարվող ծաղկային արտադրանքի ներմուծման համար մինչև ջերմոցային տնտեսությունների ստուգման և դրա արդյունքների վերլուծության ավարտը»,-ասված է հաղորդագրության մեջ։

Ռուսական կողմն այս որոշումը բացատրում է Ռուսաստանի՝ բուսասանիտարական անվտանգությունը և արտահանման ներուժը պահպանելու հանգամանքով։

Էկոնոմիկայի նախարար Գևորգ Պապոյանն ընդգծում է․ «Ընթացիկ աշխատանքային խնդիրներ են։ Զուգահեռ կարողանում ենք լուծել այդ խնդիրները»։

Ըստ վիճակագրության՝ Ռուսաստան արտահանված ավելի քան 96 մլն ծաղկային արտադրանքի համար գրանցվել է ԵԱՏՄ օրենսդրության պահանջներին և նորմերին անհամապատասխանության 135 դեպք։ Սա կազմում է 2025-ին հայտնաբերված անհամապատասխանությունների 77 %-ը։  

2025-ի ամռանը նույնպես խնդիրներ կային։  Ռոսսելխոզնադզորը հայտարարել էր, որ ներկրված, կտրված ծաղիկներն ու բողբոջները պատկանում են բարձր բուսասանիտարական ռիսկ ունեցող կարանտինային արտադրանքի կարգին։ Ռոսսելխոզնադզորը ծառայության ղեկավար Սերգեյ Դանկվերտի և Հայաստանի ՍԱՏՄ ղեկավար Տիգրան Պետրոսյանի բանակցություններից հետո պարզ դարձավ, որ  նախատեսվում է ստուգել Հայաստանում գործող բուսաբուծական ձեռնարկությունները: Ստուգման նպատակն է՝ ապահովել անվտանգ արտադրանքի մուտքը Ռուսաստանի Դաշնություն։

Ջերմոցատերերին, ի դեպ, անհանգստացնում են նաև ռուսական գազի թանկացման մասին խոսակցությունները։ Բայց  ջերմոցային տնտեսություններն այս պահին կարող են հանգիստ լինել այդ հարցում․գազի գինը չի քննարկվում, քանի որ Հայաստանն ու Ռուսաստանը երկարաժամկետ պայմանագրեր ունեն։ Հանրային ծառայությունները կարգավորող հանձնաժողովի մամուլի քարտուղար Լիանա Ազիզյանը «Ռադիոլուր»-ին ասում է, որ հանրային հետաքրքրության հարցերի վերաբերյալ յուրաքանչյուր որոշման կամ գործընթացի մասին հանրությանը կտեղեկացնեն սահմանված կարգով և պաշտոնական հարթակներով․

«ՀԾԿՀ բնական սակագնի բարձրացման հարց այս պահին չի քննարկում»։    

Պաշտոնական Երևանը հայտարարում է, որ հայ-ռուսական հարաբերությունները շարունակում են մնալ կառուցողական հիմքերի վրա։ Մայիսի 29-ին Աստանայում տեղի է ունենալու ԵԱՏՄ բարձրագույն խորհրդի նիստ։ ՌԴ փոխվարչապետ Ալեքսեյ Օվերչուկն ավելի վաղ հայտարարել էր, որ Աստանայի գագաթնաժողովում քննարկվելու է այդ կազմակերպությունում Հայաստանի հետագա կարգավիճակի հարցը։ Իսկ հայկական կողմը հայտարարում է, որ ԵԱՏՄ բարձրագույն խորհրդի նիստի անդամ երկրները չեն կարող Հայաստանը հանել միության կազմից, իսկ Երևանի օրակարգում այս պահին կառույցից դուրս գալու հարց չկա:

armradio.am