Տեղի է ունեցել COP17-ի նախապատրաստական աշխատանքների վերաբերյալ հանդիպում

Մայիսի 11-ին ՄԱԿ-ում ՀՀ մշտական ներկայացուցչության, Կենսաբազմազանության մասին կոնվենցիայի քարտուղարության և ՄԱԿ-ի Շրջակա միջավայրի ծրագրի (UNEP) համագործակցությամբ, անցկացվել է 2026թ. ՄԱԿ-ի Կենսաբազմազանության կոնվենցիայի կողմերի 17-րդ համաժողովի (COP17) նախապատրաստական աշխատանքներին նվիրված հանդիպում։
 
Ճեպազրույցի ընթացքում ՄԱԿ-ում Հայաստանի մշտական ներկայացուցիչ, դեսպան Պարույր Հովհաննիսյանը և Կենսաբազմազանության մասին կոնվենցիայի գործադիր քարտուղար Աստրիդ Շումեյքերը ներկայացրել են COP17 նախագահության տեսլականը, համաժողովի հիմնական բովանդակային առաջնահերթությունները և կազմակերպչական նախապատրաստական աշխատանքները։
 
Ճեպազրույցի ընթացքում ընդգծվել է COP17-ի կենտրոնական դերը՝ Կունմինգ-Մոնրեալի կենսաբազմազանության գլոբալ շրջանակի իրականացման առաջմղման գործում, ներառյալ դրա իրականացման հավաքական առաջընթացի առաջին գլոբալ վերանայման միջոցով։ Քննարկումները նաև անդրադարձել են կենսաբազմազանության ֆինանսավորմանը, բնիկ ժողովուրդների և տեղական համայնքների բովանդակալից մասնակցության ապահովմանը, բնապահպանական գործընթացների միջև ավելի ամուր սիներգիաների խթանմանը, ինչպես նաև «Գործողություն հանուն բնության» խորագրի ներքո Երևանում լայն և ներառական մասնակցության ապահովման գործնական կազմակերպչական հարցերին։