Բրիտանական բանակի ռազմական բժիշկներն օդապարիկով վայրէջք են կատարել Ատլանտյան օվկիանոսում

Բրիտանական բանակի ռազմական բժիշկներն օդապարիկով վայրէջք են կատարել Ատլանտյան օվկիանոսում գտնվող հեռավոր Տրիստան դա Կունյա կղզում՝ հանտավիրուսի կասկածանքով Միացյալ Թագավորության քաղաքացուն օգնություն ցուցաբերելու համար:

Տղամարդը դուրս էր եկել MV Hondius զբոսանավից, որի բորտում ապրիլի կեսերին վիրուսի բռնկում էր տեղի ունեցել: Նա վերադարձել էր Տրիստան դա Կունյա, որտեղ էլ բնակվում է:

Ատլանտյան օվկիանոսի հարավային մասում գտնվող այս արշիպելագը բրիտանական ամենահեռավոր անդրծովյան տարածքն է: Զատկի կղզու հետ մեկտեղ՝ այն նաև աշխարհի մայրցամաքներից ամենահեռու գտնվող տարածքն է, որն ունի մշտական բնակչություն:

Տրիստան դա Կունյայում բնակվում է Միացյալ Թագավորության 221 քաղաքացի: Այնտեղ օդանավակայան չկա, ուստի կղզի հասնել կարելի է միայն ծովով:

Սակայն տվյալ դեպքում այդ տարբերակը հարմար չէր, քանի որ հիվանդի թթվածնի պաշարները սպառվում էին, BBC-ին հայտնել է գործողության համակարգող, 16-րդ օդադեսանտային գրոհային բրիգադի հրամանատար Էդ Քարթրայթը:

Առողջապահության համաշխարհային կազմակերպության (ԱՀԿ) տվյալներով՝ Տրիստան դա Կունյա կղզում բնակվող բրիտանացին նավը լքել է ապրիլի 14-ին:

Ապրիլի 28-ին նրա մոտ ի հայտ է եկել դիարեյա, իսկ երկու օր անց՝ ջերմություն: Այս պահին նրա վիճակը կայուն է: Տրիստան դա Կունյա արշիպելագ են դեսանտավորվել 16-րդ օդադեսանտային գրոհային բրիգադի վեց զինծառայող-դեսանտային և երկու բժիշկ: