ԱՄՆ-ն հաստատել է Ուկրաինային աերոդինամիկ ռումբերի հնարավոր վաճառքը

ԱՄՆ պետքարտուղարությունը հաստատել է Ուկրաինային աերոդինամիկ ռումբերի հեռահարության և ճշգրտության բարձրացման միջոցների 373,6 միլիոն դոլարի հնարավոր վաճառքը` երեքշաբթի՝ մայիսի 5-ին, հայտնել է պետքարտուղարության մամուլի ծառայությունը։ Խոսքը Joint Direct Attack Munitions - Extended Range (JDAM-ER) աերոդինամիկ հավաքածուների մասին է, որոնք ամրացվում են ռումբերի պոչային հատվածներին և մեծացնում են դրանց կիրառման հեռահարությունը 70-80 կմ-ով:

Պետքարտուղարության տվյալներով՝ Կիևը դիմել է Վաշինգտոնին, 1532 նման հավաքածու վաճառելու խնդրանքով։ Պատվերը կներառի նաև դրանց սպասարկման սարքավորումներ, պահեստամասեր և վերանորոգման մասեր, ծրագրակազմ, վերանորոգման և սպասարկման ծառայություններ և լոգիստիկա: Պայմանագրի գլխավոր կապալառուն կլինի Boeing ընկերությունը։

Ինչպես նշում է ամերիկյան Military պորտալը, պետքարտուղարության հավանությունը դեռ չի նշանակում, թե զենքը շուտով կմատակարարվի: Այն միայն թույլատրում է հնարավոր վաճառքն արտերկրում: Այնուհետև պահանջվում է պայմանագրի վերջնական կնքում և ապրանքների արտադրություն, որից հետո միայն դրանք կհանձնվեն Ուկրաինային։