Ցանկանում եմ, որ հարևանները դրսևորեն նույն խիզախությունը, ինչպես դուք, և ձեզ ուղեկցեն խաղաղության ճանապարհին

«Երևանյան երկխոսություն» համաժողովի շրջանակում Ֆրանսիայի նախագահ Էմանուել Մակրոնը հայտարարեց, որ երկու համոզմունք ունի տարածաշրջանի վերաբերյալ: «Առաջինը՝ Հարավային Կովկասը չպետք է լինի կայսրությունների մրցակցության վայր, որոնք տարածաշրջանը դիտարկում են որպես ավար կամ մրցանակ՝ միմյանց դեմ հանելով տեղի ազգերին:

Երկրորդ համոզմունքն այն է, որ Հարավային Կովկասը կարող է վերականգնել (քարտեզը շատ լավ ցույց է տալիս) իր կենտրոնական դիրքը Եվրոպայի, Ասիայի և Մերձավոր Արևելքի միջև, և Հարավային Կովկասում հնարավորությունները, իրոք, ընձեռում են առիթ՝ լինելու խաչմերուկ այս տարածաշրջանում, լինել միջին միջանցք. սա ենթադրում է, որ պետք է սահմանները բացել:

Ես ցանկանում եմ, որպեսզի հարևանները դրսևորեն նույն խիզախությունը, ինչպես դուք, և ձեզ ուղեկցեն այս խաղաղության, ժողովրդավարության և բարգավաճման ճանապարհին, որպեսզի սահմանները բացվեն, և բացվեն ամբողջովին:

Այս տարածաշրջանը շատ հաճախ քիչ է նշանավորվում դրսից, շատ հաճախ և երկար ժամանակ հերմետիկ ձևով փակ է եղել: Ինչպես ասում էր Թուրքիայի հայազգի երջանկահիշատակ լրագրող Հրանտ Դինքը՝ պետք է կոտրել այն կողպեքները, որոնք մոտ ժողովուրդներին դարձնում են հեռավոր հարևաններ: Հենց դա պետք է արվի, որպեսզի Կովկասի պահը գա, որպեսզի սահմանները բացվեն, իրականում Ադրբեջանի և Թուրքիայի հետ սահմանները բացվեն, և որպեսզի չլինի որևիցե սահմանափակում Վրաստանի հետ: Սա է մեր համոզմունքը, սա պետք է լինի հանձնառությունը, նաև Ֆրանսիայի զարգացման գործակալության հանձնառությունը, որը շատ գործողություններ է իրականացնում Հայաստանում, և մոտավորապես 4 մլրդ եվրոյի ներդրումներ են իրականացվել Կովկասում»,- ասաց նա:

Մակրոնը նաև ողջունեց Ադրբեջանի կողմից Հայաստանի հետ ապրանքաշրջանառության սահմանափակումների վերացումը և հաղորդակցությունների վերականգնումը՝ ընդգծելով, որ դա միայն սկիզբն է: Նա միաժամանակ նկատեց, որ Հայաստանը նաև առանցքային հիմք է դրել ամբողջ տարածաշրջանի խաղաղության համար:

Անդրադառնալով Ռուսաստանի դերին տարածաշրջանում՝ Մակրոնը նկատեց, որ շատերը երկար ժամանակ մտածում էին, որ Հայաստանի ճակատագիրը միայն հնարավոր է Ռուսաստանի հովանավոր թևի ներքո:

«2020 թվականի պատերազմը, այն, ինչ ապրեցիք, այն ողբերգությունը, որ շատ ընտանիքներ վերապրեցին, տեսան, այն, որ դա այն հովանավորչությունը չէ, ինչպես շատերս պատկերացնում էինք:

Տեսանք, որ Ռուսաստանը լքեց ՀՀ-ին, և հասկացանք, որ այդ երազանքներն իրականություն չեն: Բոլորը կարծես սովորել էին, որ Ռուսաստանը պետք է լինի տարածաշրջանի հովանավորը, որովհետև Հարավային Կովկասը կարծես պետք է միշտ պաշտպանվի ինչ-որ մեկի կողմից, իսկ Հայաստանի պահանջը եկավ ապացուցելու, որ կա ժողովրդավարական ճանապարհ, որը սկսել եք 2018 թվականից, այսինքն՝ խաղաղությունը, որը ընտրել եք, իրատեսական է, և որ դուք դրա դերակատարն եք, որ բարգավաճում հնարավոր է՝ առանց կայսրությունների միջամտության»,- ասաց նա: