Հնդկաստանը դիտարկում է սահմանների պաշտպանության անսովոր միջոց

Հնդկաստանը դիտարկում է սահմանների պաշտպանության անսովոր միջոց․ գետային սահմանային հատվածներում կարող են օգտագործվել օձեր և կոկորդիլոսներ՝ անօրինական ներթափանցումը կանխելու համար։ Այս գաղափարը քննարկվում է Border Security Force-ում՝ Հնդկաստանի սահմանապահ ծառայությունում, որը վերահսկում է երկրի սահմանները Պակիստանի և Բանգլադեշի հետ։

Տեղեկությունը հրապարակել է The Hindu թերթը՝ հղում անելով ծառայողական փաստաթղթերին։  Մարտի 26-ի ծառայողական հաղորդագրությամբ սահմանապահ ստորաբաժանումներին հանձնարարել են գնահատել, թե որքան արդյունավետ կլինի գետային խոցելի հատվածներում սողունների՝ օձերի կամ կոկորդիլոսների տեղակայումը։

Նախաձեռնությունը իրականացվում է Հնդկաստանի ներքին գործերի նախարար Ամիտ Շահի հանձնարարությամբ։ Հնդկաստան-Բանգլադեշ սահմանն անցնում է բարդ տեղանքով՝ գետերով, բլուրներով և հովիտներով։ Այս պայմանները դժվարացնում են սահմանապահների աշխատանքը և երբեմն հնարավորություն տալիս անօրինական միգրացիայի կամ հանցավոր գործողությունների համար։ Այդ պատճառով կառավարությունը փորձում է ուժեղացնել վերահսկողությունը և կառուցել նոր սահմանային պատնեշներ։ Անվտանգության ծառայության աղբյուրների խոսքով՝ նախաձեռնությունը դեռ իրականացված չէ։ Մասնագետները պետք է պարզեն՝ որտեղից ձեռք բերել սողուններին, ինչպես վերահսկել նրանց և ինչ ազդեցություն կունենա դա սահմանամերձ բնակիչների վրա։