Նոր կանոններ Yandex Go-ի վարորդների և ծառայությունից օգտվող քաղաքացիների համար

Մրցակցության և սպառողների շահերի պաշտպանության հանձնաժողովը ներկայացրել է, թե ինչ աշխատանքներ են իրականացվել Yandex Go-ի հետ ստեղծված աշխատանքային խմբի շրջանակում առցանց տաքսիների ոլորտի բարելավման նպատակով։

Վարորդների համար

• Yandex Plus համակարգը վերածվել է cash-back-ային համակարգի և ամբողջությամբ իրականացվում է Yandex-ի հաշվին, վարորդից ոչինչ չի գանձվում։

• Եթե «Թեժ ժամեր» ալգորիթմով ուղևորության արժեքի ավելացող գործակիցը կազմում է 2 և ավելի, 2 անգամից հետո ավելացող հատվածի մասով Yandex-ը միջնորդավճար չի գանձում՝ թողնելով ամբողջ գումարը վարորդին և գործընկեր կազմակերպությանը։

• Հաշվի առնելով նաև կատեգորիաների մեջ առկա տարբերություններ միջնորդավճարների միասնական 14,9 տոկոս տարբերակը փոխարինվել է աստիճանական տարբերակով՝ «Ստարտ» կատեգորիայի համար իջեցվելով մինչև 14,5 տոկոս, իսկ ավելի բարձր կատեգորիաների ուղևորափոխադրման ծառայությունների համար կազմելով 16,5 տոկոս։

• «Բիզնես» կատեգորայում ավելացվել է «Ինքս կբացեմ դուռը» կոճակը, որը կանխում է ուղևորի և վարորդի մոտ տարընկալումների և հետևաբար ցածր գնահատականների առաջացման ռիսկը։

• Հստակեցվել են յուրաքանչյուր կատեգորիայի համար թույլատրելի մեքենաների տեսակներն ու արտադրման վաղեմությունը, ինչպես նաև դրա փոփոխման մեթոդաբանությունը՝ ապահովելու ավելի կանխատեսելի պայմաններ վարորդների համար։

Այսպես, վարորդի եկամուտը ավելի լավ հասկանալու համար դիտարկենք 2 երթուղի «Ստարտ» կատեգորիայում, երբ «Թեժ ժամեր» ալգորիթմով ուղևորության արժեքի գործակիցը 2 է։ Մի դեպքում, օրինակ, Այնթափ գյուղից դեպի Նոր Խարբերդ ուղևորությունը, որը կտևի 6 րոպե և կունենա 3,5 կմ երկարությունը, բազային կարժենա 500 դրամ։

«Թեժ ժամեր» ալգորիթմի հաշվառմամբ ուղևորության վերջնական արժեքը կկազմի 1000 դրամ։ Այս 1000 դրամից վարորդից պահումները կկազմեն 240 դրամ (14,5 տոկոս հարթակի միջնորդավճար, 4,5 տոկոս տաքսոպարկի առավելագույն միջնորդավճար, որի իրականում կարող է լինել 1 տոկոս (այն որոշվում է ոլորտում գործող բազմաթիվ տաքսոպարկերի կողմից անհատապես) և 5 տոկոս պետական տուրքի առավելագույն չափ (անկանխիկ վճարկման դեպքում այն կկազմի 4 տոկոս))։

Այսպիսով՝ այս դեպքում վարորդին մնաց 1000 դրամանոց ուղևորությունից առնվազն 760 դրամը կամ առնվազն 76 տոկոսը։ Նույն Այնթափ գյուղից դեպի Նոր Խարբերդ ուղևորության դեպքում, երբ «Թեժ ժամեր» ալգորիթմով ուղևորության արժեքի գործակիցը 3 է, այսինքն՝ ուղևորության գինը կկազմի 1500 դրամ, ապա հարթակի միջնորդավճարը կկազմի 145 դրամ (գանձվելով միայն առաջին 1000 դրամի համար), իսկ վարորդին մնացող եկամուտի չափը կկազմի առնվազն 1212,5 դրամ կամ երթի ամբողջական արժեքի առնվազն 80,8 տոկոսը։

Ուղևորների համար

• Ներկայացված է գնի բացվածքը, ինչը թույլ է տալիս ցանկացած ուղևորի տեսնել, թե ինչքան է կազմում ընտրված կատեգորիայում մեքենայի մոտեցման բազային արժեքը, ինչքան է նա վճարելու ուղևորության հեռավորության և տևողության համար, և որքան է կազմում հավելավճարը՝ կապված այդ պահին բարձր պահանջարկի հետ։

• Միևնույն ժամանակ գների բացվածքի բաժնում առանձին կոճակով ներկայացված է նաև հավելյալ տեղեկատվություն՝ գների կառուցվածքի և ձևավորման ամբողջ մեթոդաբանությամբ։

• Yandex Plus համակարգի cash-back-ային տրամաբանությունն աշխատում է այնպես, որ կուտակված միջոցները ցանկացած ծառայության շրջանակներում կարելի է օգտագործել հարթակում առկա բոլոր ծառայությունների համար՝ առանց սահմանափակումների։

• Սահմանվել է գնի աճի վերին սահմանափակում՝ եռամսյակային կտրվածքով բազային արժեքի նկատմամբ գնի x3 աճը չի կարող գերազանցել դեպքերի ընդհանուր ծավալի 5 տոկոսը։

• Սահմանվել է «Ստարտ» և «Էկոնոմ» կատեգորիաներում հերթերի ձևավորման գործիք, որը թույլ է տալիս սպառողին իրական ժամանակում գնահատել և ավելի արդյունավետ կողմնորոշվել ուղևորափոխադրման ընտրության հարցում։

• Կատեգորիաների բացվածքում ներառված մեքենաների տեսակների մասով ցուցադրվող տեղեկատվությունն այլևս թարմացվում է՝ հիմնական էջում ցուցադրելով ամենահավանական մեքենաների տեսակները՝ միևնույն ժամանակ տրամադրելով հնարավորություն՝ սեղմելով կոճակը ծանոթանալու տվյալ կատեգորիայում թույլատրելի մեքենաների մակնիշների և արտադրության վաղեմության ամբողջ ցանկին։