Շինհրապարակների նոր պահանջները․ ոլորտի արձագանքը Քաղաքաշինության կոմիտեի որոշմանը

Ավելի վաղ արդեն անդրադարձել էինք ՀՀ քաղաքաշինության կոմիտեի նոր չափորոշչին, որը նպատակ ունի նվազեցնել շինարարության ազդեցությունը օդի աղտոտվածության վրա։

Քաղաքաշինության կոմիտեի ղեկավար Եղիազար Վարդանյանի խոսքով՝ սահմանվել են պարտադիր պահանջներ, թե ինչպես պետք է հագեցված լինեն շինհրապարակները և ինչ սարքավորումներ պետք է օգտագործեն շինարարական կազմակերպությունները։ Ըստ պաշտոնյայի սա արվում է արտանետումների ռիսկը նվազագույնի հասցնելու համար։

Մասնավորապես, շինհրապարակների ներսում ճանապարհները պետք է
սալարկված լինեն բետոնով, չսալարկված հատվածները՝ ծածկված խճաքարով, ինչպես նաև պարտադիր է փոշու մարման և ջրային մշուշի գեներատորների կիրառումը։
Իսկ ի՞նչ կարծիք ունեն մարդիկ, որոնց վրա այս որոշումն անմիջական ազդեցություն ունի։

Շինարարական ոլորտի ներկայացուցիչները որոշմանը տարբեր մոտեցում ունեն։ «Սմարթ քոմփանի» ընկերության գլխավոր հաշվապահ Դավիթ Բաղոյանը նշում է, որ սկզբունքորեն դրական են վերաբերվում այն ամենին, ինչ նպաստում է օրինական դաշտում աշխատելուն։ Նրա խոսքով՝ իրենց կազմակերպությունը միշտ փորձում է պահպանել Քաղաքաշինության կոմիտեի պահանջները, սակայն նաև չբացառեց, որ նոր չափորոշիչները կարող են հանգեցնել լրացուցիչ ծախսերի։ «Վերջին տարիներին ընդունված գրեթե բոլոր որոշումները նպաստում են
թանկացումներին։ Նոր պահանջները ենթադրում են նոր ռեսուրսների
օգտագործում, իսկ դա արդեն ֆինանսական բեռ է։ Այդ ամենը, կարծում եմ, ի վերջո, կարտացոլվի գների վրա»,- մեզ հետ զրուցում նշեց նա։

Միաժամանակ կասկածում է, որ միայն նոր չափորոշիչներով հնարավոր
կլինի էապես բարելավել օդի որակը։ Նրա դիտարկմամբ՝ շատ
շինհրապարակներում դեռ արտաքինից էլ չի երևում, որ լրջորեն կազմակերպվում է փոշու նվազեցումը։ «Շատ քիչ շինություններ եմ տեսել, որ, օրինակ, կանաչ ցանցերով փակեն տարածքը։ Թեև դրանք մատչելի են, բայց արագ են վնասվում, և ոչ բոլորն են ցանկություն ունենում ժամանակին փոխել դրանք»,- նշում է նա։

Խնդիր է համարում նաև վերահսկողության պակասը։ «Անձամբ չեմ առնչվել ստուգումների, մեզ ոչ ոք չի զգուշացրել կամ տուգանել։ Եթե ցանցը պոկվում է, լավ կլիներ, որ մեկը գար, ասեր՝ վերականգնեք, բայց ես նման բան չեմ նկատել»- ընդգծում է Բաղոյանը։
Մյուս կողմից՝ ոլորտի որոշ ներկայացուցիչներ ավելի լավատես են։

Շինարարական ոլորտում աշխատող վաճառքի մենեջեր Հովհաննեսը նշում է, որ միանշանակ դրական են վերաբերվում փոփոխություններին։ Նրա խոսքով՝ եթե պահանջները լիարժեք պահպանվեն, կարող են իրական արդյունք տալ։ «Եթե հետևողական լինեն և ամեն ինչ գործնականում կիրառվի, կարծում եմ՝ դա արդյունավետ կլինի և կնպաստի աղտոտվածության նվազմանը», - ասում է նա։

Ինչ վերաբերում է բնակարանների հնարավոր թանկացմանը, Հովհաննեսը կարծում է, որ նոր չափորոշիչները պարտադիր չէ, որ գների աճի պատճառ դառնան։ «Տրամաբանական չէ, որ սա ինքնին պետք է թանկացման բերի, պետք է որ չնպաստի դրան»,- նշեց նա։

Այսպիսով, Քաղաքաշինության կոմիտեի սահմանած նոր պահանջները
շինարարական ոլորտում ընդունվում են տարբեր մոտեցումներով։ Մինչ մի մասը դրանք դիտարկում է որպես անհրաժեշտ քայլ օդի աղտոտվածությունը
նվազեցնելու համար, մյուսները մտահոգվում են լրացուցիչ ծախսերով ու
վերահսկողության արդյունավետությամբ։

Մասնագետների գնահատմամբ՝ նախաձեռնության իրական արդյունքը մեծապես կախված կլինի ոչ միայն չափորոշիչների սահմանումից, այլև դրանց հետևողական կիրառությունից և
վերահսկման մեխանիզմների գործնական աշխատանքից։