Ի՞նչ է հայտնի այսօր Սիրիային հանձնված վարձկանների մասին

Այսօր՝ հունվարի 14–ին, Սիրիայի Արաբական Հանրապետությանը հանձնված Մուհռաբ Մուհամմադ ալ-Շխերիին և Յուսեֆ Ալաբեդ ալ-Հաջինին 2020 թվականի 44–օրյա պատերազմի օրերին հայկական կողմը գերի էր վերցրել, ավելի ուշ Սյունիքի առաջին ատյանի դատարանը նրանց ցմահ ազատազրկման էր դատապարտել՝ վարձկանության և պատերազմական այլ հանցագործություններ իրականացնելու մեղադրանքով։

Ըստ «Դատալեքս»-ում առկա տեղեկատվության՝ Սիրիայում բնակվող և «Սուլթան Սուլեյման շահ» ահաբեկչական խմբավորման ղեկավար հանդիսացող՝ Աբու Համշա մականվամբ Մուհամմադ ալ-Ջասիմը նախապես հավաքագրված լինելով Թուրքիայի հատուկ ծառայությունների կողմից, նրանցից ակնհայտ ապօրինի հրահանգ է ստացել Ադրբեջանի կողմից Արցախի դեմ նախապատրաստվող պատերազմին որպես վարձկաններ մասնակցելու նպատակով հավաքագրել Սիրիայի Արաբական Հանրապետությունում բնակվող անձանց եւ սկսել է տարբեր անձանց միջոցով հավաքագրել նյութապես ծանր վիճակի մեջ գտնվող անձանց:

Նույն օրը՝ ժամը 23։00-ի սահմաններում, վարձկաններն անարգել հատել են Սիրիայի և Թուրքիայի պետական սահմանը, որի ընթացքում Թուրքիայի սահմանը հսկող պաշտոնատար անձանց կողմից չեն պահանջվել և չեն ստուգվել նրանց անձնագրերը։

Նույն եղանակով նշված 250 վարձկանները՝ Թուրքիայի դրոշը կրող քաղաքացիական ինքնաթիռներով տեղափոխվել են Թուրքիայի քաղաքացիական մեկ օդանավակայանից մյուսը, որտեղ նրանց դիմավորել են շուրջ 50 թուրք զինվորականներ: Վերջիններիս ուղեկցությամբ ի թիվս այլ վարձկանների Ալ Շխերին Ադրբեջանի դրոշը կրող ինքնաթիռով 2020 թվականի հոկտեմբերի 18-ին՝ առավոտյան տեղափոխվել է Ադրբեջանի քաղաքացիական օդանավակայան, որտեղ նրանց դիմավորել են Ադրբեջանի զինված ուժերի համազգեստով ավելի քան 30 զինվորականներ, ովքեր, առանց որևէ հարց ուղղելու, անձնագրերը պահանջելու կամ ստուգելու, նստեցրել են նրանց ավտոմեքենաները և տեղափոխել Ադրբեջանի ռազմական օբյեկտներից մեկը, որտեղ նրանք մնացել են յոթ օր, ալ-Ջասիմիի, թուրք և ադրբեջանցի զինվորականների կողմից պարբերաբար իրականացվել են նախապատրաստվող ռազմական գործողությունների վերաբերյալ քննարկումներ, որոնց ընթացքում վերջիններիս կողմից ագրեսիվ պատերազմի հրապարակային կոչեր են հնչել, այն է՝ չխնայել որևէ անձի կյանք, բոլոր հայերին գլխատել և սպանել: Բացի այդ, վարձկանները ստացել են Ադրբեջանի զինված ուժերի տարբերանշանով համազգեստ և զենք։ Խմբավորման ղեկավար Աբու Համշային հատկացվել է նաև սպիտակ գույնի «Տոյոտա» մակնիշի պիկապ տեսակի ավտոմեքենա։

2020 թվականի հոկտեմբերի 25-ին Մուհհռաբ Մուհամմադ Ալ Շխերին, մյուս վարձկանների հետ ալ-Ջասիմիի ղեկավարությամբ, տեղակայվել են վերջիններիս հատկացված առանձին ռազմական օբյեկտում, որտեղ արդեն իսկ տեղակայված են եղել նույն խմբավորման շուրջ 180 անդամներ։

2020 թվականի հոկտեմբերի 29-ին՝ ժամը 04։00-ի սահմաններում Աբու Համշայի կողմից  խմբավորման 250 անդամներին հրաման է տրվել տրվել պատրաստվել ռազմական գործողության, այն է՝ հարձակվել հայկական գյուղի վրա, գրավել այն, իսկ տեղի քաղաքացիական բնակչությանը և զինվորականներին սպանել, գլխատել, ինչպես նաև Արցախի և Հայաստանի ներքին վիճակն ապակայունացնելու նպատակով իրականացնել հրկիզումներ և պայթյուններ։

Թվով 150 վարձկանների հետ ալ-Շխերին փաստացի մասնակցելով ռազմական գործողություններին և սկսելով հարձակումը՝ իր դիտավորյալ գործողություններն ավարտին չի հասցրել իր կամքից անկախ հանգամանքներում, քանի որ 2020 թվականի հոկտեմբերի 31-ին՝ ժամը 14.00-ի սահմաններում, Հայաստանի Սյունիքի մարզի բնակավայրերի մոտակայքում հանդիպելով Հայաստանի զինված ուժերի դիմադրությանը, վնասազերծվել է և հանձնվել Հայաստանի իրավապահ մարմիններին։

Ըստ քրեական գործի՝  մյուս մեղադրյալին՝ Յուսեֆ Ալաբեդ ալ-Հաջիին  ռազմական գործողություններին մասնակցելու առաջարկությունն արել է Սիրիայի Իդլեբ նահանգի բնակիչ՝ Աբու Ահմադ մականվամբ Իբրահիմ Ռաբ Ալ Այալը։

Նա էլ 2020 թվականի հունիս ամսից մինչև սեպտեմբեր ամիսն ընկած ժամանակահատվածում շուրջ 500 վարձկանների հետ միասին մասնակցել է ֆիզիկական, մարտական և ռազմական պատրաստվածության դասընթացներին, ապա տեղափոխվել Սիրիայի Բաբ Ալ Սալամ սահմանային անցակետ, եւ նույն ճանապարհով հայտնվել Ադրբեջանի, ապա Արցախի տարածքում։

Նա նույնպես իր ցուցմունքում պատմել է, որ իրենց հրամայել են չխնայել որևէ անձի կյանք, բոլոր հայերին գլխատել, սպանել, ավելին՝ յուրաքանչյուր հայի կտրած գլխի ներկայացման համար վարձկաններին խոստացել են 100 ԱՄՆ դոլար պարգևավճար: Հայերին գլխատելու և դրա դիմաց պարգևավճարներ ստանալու նպատակով, ի թիվս այլ վարձկանների, Յուսեֆ Ալաբեթ ալ-Հաջիին տրամադրվել են մարդուն գլխատելու համար հարմարեցված երկար սայրով դանակներ։

Նա նույնպես 2020 թվականի նոյեմբերի 2-ին՝ ժամը 18.00-ի սահմաններում, Հայաստանի Սյունքի մարզի Դավիթ Բեկ գյուղի մոտակայքում հանդիպելով Հայաստանի Հանրապետության զինված ուժերի դիմադրությանը, վնասազերծվել է և հանձնվել Հայաստանի իրավապահ մարմիններին։

«Դատալեքսում» առկա է տեղեկատվություն այն մասին, որ ըստ Մուհռաբ Մուհամմադ ալ-Շխերիի բանավոր հայտարարության՝ վերջինս նախկինում դատապարտված է եղել անզգուշությամբ սպանություն կատարելու համար։