Հայհոյում ու Մայր տաճարի դռանն էին խփում. այդ պահին սիրտս ոնց որ պայթեր. Տեր Վրթանես

Ես ինձ շատ լավ եմ զգում, փառք Տիրոջը, կազդուրման փուլում եմ, երկու ստենտ են դրել, սուր ինֆարկտ է եղել մոտս։ Հիմա շատ լավ եմ, երկու օրից երևի պալատում կլինեմ, եթե Աստված հաջողի 5-6 օրից էլ նաև ծառայության մեջ կլինեմ։ Այս մասին NEWS.am–ի հետ զրույցում նշեց Բյուրականի Սուրբ Հովհաննես եկեղեցու հոգևոր հովիվ տեր Վրթանես քահանա Բաղալյանը։

Շատ ապրեն ոստիկանները, մի պահ շատ վատ էի, մի ոստիկան ինձ մի կողմ տարավ, լրագրողներից մեկը շտապօգնություն զանգեց։ Տեր հայրերը արագ հավաքվեցին, տարան հիվանդանոց։

Ստենտավորել են սիրտս, Էջմիածնի «Մաստերմեդ» հիվանդանոցում եմ, շատ հոգատար են իմ նկատմամբ թե բժիշկները, թե մաքրուհիները, ամբողջ անձնակազմը գործել է բարձր պրոֆեսիոնալիզմով։

Հիմա ես կարծես 5 օրով արձակուրդ եմ գնացել։ Արձակուրդս կավարտվի, կմիանամ ձեզ։ Դուք էլ ամուր եղեք, Մայր աթոռի ու վեհափառ հայրապետի կողքին եղեք»։

Հիշեցնենք, որ երեկ Մայր Աթոռ Սուրբ Էջմիածնում, որտեղ լարված իրավիճակ էր, վատացել էր Բյուրականի Սուրբ Հովհաննես եկեղեցու հոգևոր հովիվ տեր Վրթանես քահանա Բաղալյանի ինքնազգացողությունը, նրան շտապ տեղափոխել են հիվանդանոց և սիրտը ստենտավորել են։