Եսայանների «Թիմ Սոլյուշնս» ընկերությունը երկուսուկես տարում պետությունից 3 մլրդ դրամի պատվեր է ստացել

«Թիմ» ընկերությունների խմբի սեփականատերեր Հայկ և Ալեքսանդր Եսայաններին պատկանող «Թիմ Սոլյուշնս» ընկերությունը հիմնադրման օրվանից՝ 2020 թվականի նոյեմբերից՝ ծառայությունների մատուցման խոշոր գործարքներ է կնքում պետական գերատեսչությունների հետ՝ մեծ մասամբ Պետական եկամուտների կոմիտեի։ «Հետքի»-ի փոխանցմամբ`այս ՏՏ ընկերությունը, որը զբաղվում է ծրագրային ապահովման մշակմամբ, վերջին 2,5 տարիների ընթացքում պետությունից ավելին քան 3 միլիարդ դրամի պատվեր է ստացել։

«Թիմ Սոլյուշնս» փակ բաժնետիրական ընկերությունը հիմնադրվել է 2020 թվականի նոյեմբերի 11-ին։ Ըստ ընկերության իրական շահառուների հայտարարագրի՝ ՓԲԸ-ում 50-ական տոկոս բաժնեմաս ունեն եղբայրներ Հայկ և Ալեքսանդր Եսայանները։ Նրանք այս ընկերությունը հիմնել են «Յուքոմից» դուրս գալուց և «Բիլայնը» (ներկայում՝ «Թիմ Տելեկոմ») ձեռք բերելուց հետո։

Հիշեցնենք՝ Հայկ և Ալեքսանդր Եսայանները «Յուքոմում» 2,97-ական տոկոս բաժնեմաս են ունեցել, Հայկ Եսայանը զբաղեցրել է ընկերության տնօրենի պաշտոնը, սակայն 2020 թվականին Եսայանների և ընկերության մյուս բաժնետերերի, մասնավորապես Գուրգեն, Արտյոմ (ՊԵԿ նախկին նախագահ Գագիկ Խաչատրյանի որդիները) և Արամ (Գագիկ Խաչատրյանի եղբորորդին) Խաչատրյանների միջև տարաձայնություններ եղան, ինչից հետո Եսայանները լքեցին «Յուքոմը» և իրենց հիմնած «Թիմ» ՍՊԸ-ով 2020թ․ հոկտեմբերի 29-ին գնեցին «ՎԵՈՆ Արմենիա» ՓԲԸ-ի (ապրանքանիշը՝ «Բիլայն») 100 տոկոս բաժնետոմսերը։ Հետագայում «Բիլայնը» դարձավ «Թիմ Տելեկոմ», որն այժմ պատկանում է 2023թ․ ապրիլի 11-ին հիմնված «Տելեկոմ Արմենիա» ԲԲԸ-ին («ՎԵՈՆ Արմենիայի» իրավահաջորդ), որի սեփականատերերը Հայկ և Ալեքսանդր Եսայաններն են։

«Թիմ Սոլյուշնս» ՓԲԸ-ն հիմնադրվելուց հետո ակտիվորեն ներգրավվում է պետական գնումների գործընթացում և ընդամենը մեկ ամիս անց՝ 2020թ․ դեկտեմբերին ՊԵԿ-ից ստանում է իր առաջին խոշոր պայմանագիրը, արժեքը՝ 100 միլիոն դրամ։ Այս գումարի դիմաց ընկերությունը ՊԵԿ-ում հիպոթեքային վարկի սպասարկման համար վճարված տոկոսագումարների չափով եկամտահարկի վերադարձի էլեկտրոնային հարթակի ներդրման խորհրդատվական ծառայություններ է մատուցել։ 

Պետական գնումների armeps.am համակարգի տվյալներով՝ ընդհանուր առմամբ վերջին երկուսուկես տարիների ընթացքում «Թիմ Սոլյուշնսը» կնքել է 17 պայմանագիր, որից 13-ը՝ Պետական եկամուտների կոմիտեի, իսկ 4-ը Ֆինանսների նախարարության հետ, իսկ պայմանագրերի ընդհանուր արժեք կազմել է 3 մլրդ 150 մլն դրամ։

Այդ պայմանագրերից ամենախոշորը կնքվել է մեկ ամիս առաջ։ 2023 թվականի մայիսի 4-ին կնքված գնման պայմանագրի համաձայն՝ «Թիմ Սոլյուշնս» ընկերությունը պարտավորվել է ՊԵԿ-ում ներդրված «Հարկատու 3» համակարգի և դրա ենթահամակարգերի սպասարկման խորհրդատվական ծառայություններ մատուցել, ինչի դիմաց ստանալու է 1 մլրդ 290 մլն դրամ գումար։ Գնումն իրականացվել է «հրատապ բաց մրցույթ» ընթացակարգով, որին մասնակցելու հայտ է ներկայացրել միայն «Թիմ Սոլյուշնս» ՓԲԸ-ն։

Կնքված խոշոր պայմանագրերից մեկի արժեքն էլ կազմել է 414 մլն դրամ, մյուսինը՝ 383 մլն դրամ։

Եսայանները 2023 թվականի ընթացքում կարողացել են ընդլայնել իրենց բիզնեսը։ Այս տարվա մարտի 6-ին հայտնի դարձավ, որ «Թիմ» ընկերությունների խումբը գնել է Երևանի Աբովյան փողոցում գտնվող «Գրանդ Հոթել Երևան» հյուրանոցը։ Մայիսի 31-ին էլ «Թիմը» հայտարարեց վրացական հեռահաղորդակցության օպերատոր SkyTel-ի 30 տոկոս բաժնեմասի ձեռքբերման մասին։