Հնագետները Վեներայի արձանիկ են գտել հին հռոմեական աղբանոցում

Հնագետները Վեներայի արձանիկ են գտել հին հռոմեական աղբանոցի պեղումների ժամանակ։ Այն եղել է ֆրանսիական Ռեն քաղաքի ծայրամասում գտնվող պատմական քարհանքի տարածքում, որն այն ժամանակ կոչվել է Condate Riedonum։

Քարհանքը թվագրվում է մեր թվարկության 1-ին դարով։ Հռոմեացիներն այնտեղ շինանյութ են արդյունահանել, սակայն ժամանակի ընթացքում հանքավայրերը պակասել են։ Մ․ թ․ 2-րդ դարում քարհանքը լքել են եւ օգտագործել են որպես աղբանոց:

Հռոմեական աղբի շերտերի պեղումների ժամանակ գիտնականները գտել են բազմաթիվ իրեր, այդ թվում՝ խեցեղենի բեկորներ, աստվածությունների մի քանի հախճապակյա արձանիկներ, մետաղադրամներ եւ Վեներայի արձանիկ։

Քանդակը ստեղծել են մեր թվարկության 1-2-րդ դարերում։ Այն պատկերում է գեղեցկության, սիրո եւ պտղաբերության մերկ աստվածուհուն։ Արձանիկը 10 սմ բարձրություն ունի եւ պատրաստված է թրծակավից։