Գերմանիայի ԱԳ նախարարը Թուրքիային կոչ է արել հրաժարվել Միջերկրական ծովի արեւելյան հատվածում սադրանքներից

Թուրքիան պետք է հրաժարվի Միջերկրական ծովի արեւելյան հատվածում սադրանքներից, տարածաշրջանում ստեղծված իրավիճակում Գերմանիան լիովին համերաշխ է ԵՄ իր գործընկերներ Կիպրոսի եւ Հունաստանի հետ։ Այս մասին այսօր Նիկոսիա ուղեւորվելուց առաջ լրագրողներին ասել է Գերմանիայի ԱԳ նախարար Հայկո Մաասը։ Նա հոկտեմբերի 13-ին այնտեղից ուղեւորվելու է Աթենք, փոխանցում է ՏԱՍՍ-ը։

«Կիպրոսն ու Հունաստանը ԵՄ-ում մեր գործընկերներն են։ Այս կապակցությամբ ես ուղեւորվում եմ Նիկոսիա եւ Աթենք՝ իմ գործընկերներին հավաստիացնելու մեր լիակատար համերաշխության մասին»,- նշել է գերմանացի նախարարը։ Նա տարածաշրջանում «բոլոր կողմերին» կոչ է արել կառուցել «ողջամիտ բարիդրացիական հարաբերություններ»։

«Այս կապակցությամբ մենք Թուրքիային կոչ ենք անում միակողմանի միջոցառումներով չփակել Հունաստանի հետ երկխոսության հիմա դեռեւս բաց պատուհանը։ Անկարան պետք է դադարեցնի լիցքաթափումը սադրանքներով հերթագայելու քայլերը»,- հայտարարել է Մաասը։

«Եթե իսկապես բանը հասնի Միջերկրական ծովի վիճելի արեւելյան շրջաններում գազի հանքավայրերի նոր մշակմանը, սա լուրջ հարված կլինի ապաէսկալացիային ուղղված ջանքերին»,- նախազգուշացրել է Մաասը։ Նա հավելել է, որ հոկտեմբերի 15-16-ին Եվրոպական խորհրդի նիստում կբարձրացնի այս նոր միակողմանի գործողության հարցը, որը Թուրքիայի կողմից լուրջ էսկալացիա է։

Թուրքական Oruc Reis հետազոտական նավը հաջորդ 10 օրերին սեյսմահետախուզական աշխատանքներ է անցկացնելու Միջերկրական ծովի արեւելյան հատվածում։ Reuters գործակալության փոխանցմամբ՝ այս մասին կիրակի հայտարարաել էր Թուրքիայի ՌԾՈՒ-ն։ Գերծակալությունը նշում է, որ նման որոշումը, հավանաբար, կդառնա Թուրքիայի եւ Հունաստանի հարաբերություններում լարվածության մեծացման պատճառը։ Թուրքական Ataman եւ Cengiz Han նավերը տարածաշրջանում աշխատանքները շարունակելու են մինչեւ հոկտեմբերիր 22-ը, հստակեցրել են ՌԾՈՒ-ից։