Աֆղանստանում առնվազն 13 մարդ է մահացել մահապարտի ավտոմեքենայի մեջ ռումբի պայթյունի հետեւանքով

Աֆղանստանի արեւելքում առնվազն 13 մարդ է մահացել մահապարտի բեռնատարի մեջ ռումբի պայթյունի հետեւանքով, հայտնում է Associated Press-ը` վկայակոչելով կառավարության աղբյուրները:

Երկրի ՆԳՆ խոսնակ Թարիք Արիանը հայտնել է, որ առնվազն 38 մարդ է վիրավորվել Նանգարհար նահանգում տեղի ունեցած պայթյունի արդյունքում: Պայթյունը տեղի է ունեցել այն ժամանակ, երբ տեղացիները հավաքվել էին մոտակա մզկիթի մոտ ցերեկային աղոթքների համար:

Նահանգապետի խոսնակ Աթահուլահ Հոգյանին ասել է, որ պայթյունից հետո մի քանի զինված մարդ փորձել է ներխուժել Գանիհայիլ թաղամասի շենքեր, սակայն աֆղանական ուժերը նրանց գնդակահարել են:

Դեռ որեւէ խմբավորում չի հայտարարել միջադեպի համար իր պատասխանատվության մասին:

Դեպքը տեղի է ունեցել Աֆղանստանի կառավարության եւ Քաթարում արմատական ​​«Թալիբան» շարժման միջեւ բանակցությունների մեկնարկի ֆոնին, որի նպատակն է վերականգնել խաղաղությունը երկրում տասնամյակներ տեւած պատերազմից հետո: