Մուսա Դեմբելե․ «Լիոնի» թիմային ոգին փոխվել է

Չեմպիոնների լիգայի քառորդ եզրափակիչում Անգլիայի փոխչեմպիոն «Մանչեսթեր Սիթիին» երկու գոլ խփած «Լիոնի» 24-ամյա ֆրանսիացի հարձակվող Մուսա Դեմբելեն մեկնաբանել է 3։1 հաշվով հաղթանակը կատալոնացի Խոսեպ Գվարդիոլայի գլխավորած թիմի նկատմամբ եւ կիսաեզրափակիչ դուրս գալը։

Դեմբելեն փոխարինման էր դուրս եկել վերջնամասում եւ դարձել դուբլի հեղինակ։ Նա ճանաչվել է հանդիպման լավագույն խաղացող։

«Պահեստայինների նստարանին մնալը միշտ չէ, որ հեշտ է տրվում։ Երբ մտնում ես խաղի մեջ, ձգտում ես դրսեւորել լավագույն որակներդ եւ օգնել թիմին։ Այս անգամ դա ինձ հաջողվեց։

«Լիոնի» թիմային ոգին փոխվել է։ Հիմա մենք առաջատար թիմերից մեկն ենք»,- Դեմբելեի խոսքը մեջբրում է ՈւԵՖԱ-ի մամուլի ծառայությունը։

Կիսաեզրափակիչում «Լիոնը» օգոստոսի 19-ին Լիսաբոնում կմրցի Գերմանիայի չեմպիոն Մյունխենի «Բավարիայի» հետ, որը 8։2 հաշվով պարտության էր մատնել «Բարսելոնային»։