Բովանդակային փոփոխություն չի լինելու․ Մակունցը՝ «Հայ եկեղեցու պատմություն» առարկան դպրոցական ծրագրից հանելու մասին

«Հայ եկեղեցու պատմություն» առարկան չի հանվում օրակարգից, այն համադրվելու է հայ ժողովրդի պատմության հետ եւ բովանդակային առումով որեւէ փոփոխություն չի լինելու։ Այս մասին այսօր՝ հունիսի 8-ին, լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը՝ անդրադառնալով հանրային քննարկման ներկայացված՝ կրթության նոր չափորոշիչներին, ըստ որոնց «Հայ եկեղեցու պատմություն» առարկան առանձին չի դասավանդվելու դպրոցներում։

«Բացարձակ փոփոխության չի ենթարկվելու առարկայի բովանդակային հատվածը։ Կարծում եմ՝ քրիստոնեության եւ հայ եկեղեցու դերը թե հայապահպանման գործում, թե հայոց լեզվի եւ հայագիտության պահպանման գործում, թե պետության համար շատ կարեւոր է եղել եւ այդ հատվածը հանդիսանում է մեր պատմության ամենակարեւոր բաղկացուցիչ մասերից մեկը։ Քանի որ դեռ քննարկման փուլում է, կարծում եմ՝ դեռ ժամանակ կա եկեղեցու հետ քննարկումներ ծավալելու առումով»,- ասաց նա։

Պատգամավորը նշեց, որ ինքն էլ պատրաստվում է շուտով այս հարցով հանդիպել Մայր Աթոռի ձեռագրատան, արխիվի և թանգարանների տնօրեն Ասողիկ աբեղա Կարապետյանի հետ։

Անդրադառնալով այն կարծիքներին, որ սա եկեղեցու դեմ արշավ է, Մակունցը առաջարկեց զերծ մնալ նման ձեւակերպումներից։

«Չգիտեմ՝ ինչքանով է այս պահին, օրինակ իրականությանը համապասատանում, բացարձակ չի համապատասխանում իրականությանը»,- ասաց նա: