Ջեյ Զի vs Քանյե Ուեսթ. վեճը շարունակվում է
Շատ ջրեր են հոսել այն ժամանակվանից, երբ Արեւմտյան ու Արեւելյան ափերի ռեփերների միջեւ պատերազմներ էին ընթանում։
Բայց, ըստ երեւույթին, Քանյե Ուեսթն ու Ջեյ Զին որոշել են շարունակել անդադար վիճելու այդ ավանդույթը։
Երկու օր առաջ Բեյոնսեի ամուսինը թողարկել է «4։44» նոր ալբոմը, որտեղ պատմել է ոչ միայն կնոջ հանդեպ իր դավաճանությունների, այլեւ լեսբուհի մոր մասին։
47-ամյա ռեպերը չի մոռացել հիշատակել նաեւ Քանյե Ուեսթի հետ իր հարաբերությունների մասին։
Kill Jay Z երգում Ջեյ Զին խոսում է այն մասին, որ Քանյե Ուեսթին 20 մլն դոլար է պարտքով տվել։
«Դու նրան 20 մլն տվեցիր, առանց մի վայրկյան մտածելու, իսկ նա բեմից քո մասին 20 րոպե ռեպլիկներ էր ասում, ինչի՞ մասին էր նա մտածում»։
Մինչ համացանցում երաժշտասերները փորձում են հասկանալ, թե ինչի համար է Ջեյ Զին այդքան գումար պարտքով տվել Քիմ Քարդաշյանի ամուսնուն, մենք հիշեցնենք, թե ինչից է սկսվել այդ ամենը։
Քանյեն բարկացել էր Ջեյ Զիի վրա, երբ նա նույնիսկ չէր հետաքրքրվել նրա կնոջ՝ Քիմ Քարդաշյանի վիճակով՝ անցած տարվա հոկտեմբերին Փարիզում կողոպուտի ենթարկվելուց հետո։ Նոյեմբերին, Սակրամենտոյում համերգի ժամանակ Քանյեն 20 րոպեանոց ելույթ էր ունեցել, որում հիշատակել էր նաեւ Բեյոնսեին ու Ջեյ Զիին։
«Բեյոնսե, ես շատ հիասթափված եմ։ Ես լսել եմ, որ դու չէիր ուզում ելույթ ունենալ MTV-ով, եթե այն ժամանակ ես հաղթող դառնայի։ Ջեյ Զի, մենք եղբայրների պես ենք եղել, բայց դու նույնիսկ չզանգահարեցիր ինձ, չեկար իմ տուն, որ հետաքրքրվես, թե ինչպես են կնոջս գործերը»։
Ճիշտ է, այս գարնանը Քիմը, Քանյեն, Ջեյ Զին ու Բեյոնսեն հանդիպել էին, որպեսզի հարթեն իրենց հարաբերությունները։ Մի խոսքով, այս աստղերից մարդ գլուխ չի հանում։