Ինչ է կատարվում եվրոպական առաջնություններում

Երկար դադարից հետո եվրոպական թոփ առաջնություններում վերսկսվել են հանդիպումները: Միայն Ֆրանսիան հրաժարվեց շարունակել ֆուտբոլի առաջնությունը: Իսկ ինչ է կատարվում մյուս առաջնություններում:

ԱՆԳԼԻԱ

Սկսվել է 32-րդ տուրը: Կայացել է մեկ խաղ. Աստոն Վիլան, որը պայքարում է ուժեղագույնների խմբում տեղը պահպանելու համար 1:0 հաշվով սեփական դաշտում պարտվեց Վուլվերհեմփթոնից: 

Հիշեցնենք, որ Անգլիայում արդեն հայտնի է չեմպիոնը. երեսուն տարվա ընդմիջումից հետո վերջապես չեմպիոն դարձավ Լիվերպուլը:

Կարծես թե պարզ է, որ երկրորդ տեղում կլինի Մանչեսթեր Սիթին, իսկ Չեմպիոնների լիգայում հանդես գալու իրավունք տվող երրորդ եւ չորրորդ տեղերի համար թեժ պայքար է ընթանում Լեսթերի, Չելսիի, Վուլվերհեմփթոնի եւ Մանչեսթեր Յունայթեդի միջեւ: 

Ուժեղագույնների խմբում իրենց տեղը պահպանելու համար Աստոն Վիլայից բացի կռիվ են տալիս նաեւ Վոթֆորդը, Վեսթ Հեմը եւ Բորնեմութը: Նորվիչը արդեն կորցրել է տեղը պահպանելու հույսը:

ԻՍՊԱՆԻԱ

Այստեղ եւս ընթանում է 32-րդ տուրը: Կայացել է արդեն հինգ խաղ: Կարեւոր երկու միավոր կորցրեց Բարսելոնան՝ Վիգոյում 2:2 ավարտելով հանդիպումը Սելտայի հետ: Հիմա առաջատարը Բարսելոնան է, որը մեկ միավոր ավելի ունի, քան Ռեալը, բայց մեկ խաղ էլ ավելի է անցկացրել: Այսօր Ռեալը Բարսելոնում մրցելու է Էսպանյոլի հետ, որն իր հերթին պայքարում է ուժեղագույնների խմբում մնալու համար:

Երրորդ եւ չորրորդ տեղերի համար պայքարն ընթանում է Ատլետիկոյի եւ Սեւիլիայի միջեւ: Մյուս թիմերը, հազիվ թե միջամտեն այդ պայքարին:

Այսօր թվում է, որ Մալյորկային, Լեգանեսին եւ Էսպանյոլին այլեւս ոչինչ չի կարող օգնել ուժեղագույնների խմբում մնալու համար:

ԻՏԱԼԻԱ  

Իտալիայում ընթացքի մեջ է 28-րդ տուրը: Այսօր Երեւանի ժամանակով 7,15-ին Հենրիխ Մխիթարյանի Ռոման մրցակցի դաշտում կմրցի Միլանի հետ:

Առայժմ Ռոման 48 միավորով 5-րդ տեղում է եւ չորրորդ տեղում գտնվող Ատալանտայից հետ է մնում վեց միավորով:

Յուվենտուսը չորս միավորով գերազանցում է Լացիոյին: Ի դեպ, այս տուրում այս երկու թիմերն էլ հաղթանակներ տարան: Ինտերն էլ Լացիոյից հետ է մնում յոթ միավորով:

Այնպիսի տպավորություն է, որ ՍՊԱԼ-ն ու Բրեշան դուրս կմնան A սերիայից: Իսկ Ուդինեզեն, Սամպդորիան, Լեչեն եւ Ջենոան դեռ տասը տուր կպայքարեն իրենց տեղը պահպանելու համար:

ԳԵՐՄԱՆԻԱ

Կարգապահ գերմանացիներն առաջինը վերսկսեցին առաջնությունը եւ առաջինն ավարտեցին այն: Չեմպիոն դարձավ Բավարիան: Երկրորդ տեղը բաժին հասավ Դորտմունդի Բորուսիային: Չեմպիոնների լիգայում կխաղան նաեւ Լայպցիգը եւ Մյունխենգլադբախը:

Բայերը, Սարգիս Ադամյանի Հոֆենհայմը եւ Վոլֆսբուրգը կխաղան Եվրոպայի լիգայում:

Ֆորտունան եւ Պադերբորնը կխաղան երկրորդ Բունդեսլիգայում, իսկ Վերդերը անցումային հանդիպումներ կանցկացնի: Նրա մրցակիցը կորոշվի այսօր: Վերդերը կհանդիպի կամ Հայդենհայմի կամ Համբուրգի հետ:

Մյուս մրցաշրջանում Բունդեսլիգայում կխաղան Արմինիան եւ Շտուտգարտը:

Top-News.am