«Աշխատատեղերն անհրաժեշտ են նախևառաջ Ռուսաստանի քաղաքացիներին»․ Ժիրինովսկու կոչը

 Ռուսաստանի լիբերալ-դեմոկրատական կուսակցության ղեկավար Վլադիմիր Ժիրինովսկին առաջարկել է սահմանափակել կորոնավիրուսի պատճառով Ռուսաստանը լքած աշխատանքային ներգաղթյալների վերադարձը երկիր, քանի որ ճգնաժամից հետո աշխատատեղերն անհրաժեշտ կլինեն «նախևառաջ Ռուսաստանի քաղաքացիներին», գրում է ria.ru-ն։

«Կորոնավիրուսի պատճառով Ռուսաստանից շատ աշխատանքային ներգաղթյալներ են հեռացել։ Հեռանկարում պետք է սահմանափակել նրանց վերադարձը Ռուսաստան։ Մենք հիմա էլ կարող ենք ավելի շատ գործազուրկներ ունենալ, և աշխատատեղերը պետք են առաջին հերթին Ռուսաստանի քաղաքացիներին»,- գրել է Ժիրինովսկին իր Telegram-ալիքում։

ՌԼԴԿ առաջնորդն առաջարկել է Միջին Ասիային օգնել մրգերի, բանջարեղենի, հատապտուղների և այլ ապրանքների մեծ պատվերներով, որոնք այդ երկրներում ավելի լավ են աճում կամ արտադրվում, որպեսզի այդ երկրների քաղաքացիներն «իրենց հայրենիքում» աշխատելու հնարավորություն ունենան։