Ադրբեջանը արտահանձնման իրավաբանական ինստիտուտը քաղաքական նպատակներով է գործածում
Ադրբեջանը արտահանձնման իրավաբանական ինստիտուտը քաղաքական քարոզչության նպատակներով է գործածում։ Այս մասին NEWS.am–ի թղթակցի հետ զրույցի ժամանակ ասել է Հայաստանում Չեխիայի արտակարգ ու լիազոր դեսպան Պետր Միկիսկան՝ անդրադառնալով Լեռնային Ղարաբաղ կատարած այցելության համար Եվրախորհրդարանի մի շարք պատգամավորների (ֆրանկ Էնգել (Լյուքսեմբուրգ), Էլենի Տեոխարուս (Կիպրոս) ու Յարոմիր Շտետին (Չեխիա) նկատմամբ Ադրբեջանի կողմից միջազգային հետախուզում հայտարարելուն, նաեւ բլոգեր Ալեքսանդր Լապշինին Մինսկից արտահանձնելուն ու Բաքվում կալանավորելուն։
Պատասխանելով այն հարցին, արդյոք այդ դեպքերը վտանգավոր նախադեպ չեն, որոնք սպառնում են այլ երկրների քաղաքացիներին ու խորհրդարանականներին, դեսպանը նշել է «Դա շատ նուրբ հարց է, քանի որ ԵՄ-ն ու ԵԽ երկրները մի կողմից աջակցում են կոռուպցիայի, միջազգային հանցագործությունների դեմ պայքարին, ու այս առումով արտահանձնման ինստիտուտը շատ կարեւոր է։ Հետեւաբար «Ա» երկրների իշխանություններին պետք է թույլատրվի հետախուզում հայտարարել «Բ» երկրների քաղաքացիների հանդեպ, եթե նրանք հանցագործություն են կատարել «Ա» երկրների տարածքում։ Բայց այդ դեպքում պետք է զանազանել հանցագործություններն ու քաղաքական դրդապատճառներով արվող քայլերը։
«Վերոնշյալ դեպքում Ադրբեջանը առաջնորդվել է քաղաքական, այլ ոչ թե իրավական դրդապատճառներով։ Որոշ իրավաբաններ ասում են, որ ադրբեջանական սահմանի այսպես կոչված «ապօրինի հատումը» հանցագործություն չէ այլ երկրներում, հետեւաբար Բաքվի կողմից տրամադրված հետախուզության օրդերը չպետք է իրավաբանորեն պարտադիր համարվի։ Մյուս փաստաբաններն էլ ասում են, որ Ադրբեջանը չի վերահսկում սահմանը, որը հատել են Ալեքսանդր Լապշինը կամ Յարոմիր Շտետինը, հետեւաբար Բաքվի պահանջը իրավական տեսակետից սխալ է։ Դա շատ նուրբ ու բարդ իրավիճակ է»,- նշել է Պյոտր Միկիսկան։ Նա համոզված է , որ այլ երկրներից է կախված՝ նրանք կընդունեն, թե չեն ընդունի Ադրբեջանի հայտարարած օրդերը։ «Որոշ երկրներ դրան արձագանքել են՝ արտահանձնման տեսքով, ինչպես Ալեքսանդր Լապշինի դեպքում էր։ Ես գիտեմ, որ ոչ մի այլ երկիր Ադրբեջանի կողմից հայտարարված միջազգային հետախուզությանը չի արձագանքել։ Իմ կարծիքն այն է, որ արտատարածքային օրդեր հասկացությունը պետք է շատ զգույշ օգտագործվի»,- ամփոփել է Հայաստանում Չեխիայի դեսպանը։
Հիշեցնենք, որ հունիսի 22-ին Բաքվի ծանր հանցագործություններ քննող դատարանում սկսվել է Ադրբեջանում կալանավորված բլոգեր Ալեքսանդր Լապշինի գործով դատավարությունը։
Ռուսաստանի եւ Իսրայելի քաղաքացի Ալեքսանդր Լապշինը ձերբակալվել է 2016-ի դեկտեմբերին Մինսկում՝ Ադրբեջանի պահանջով, որտեղ նա ներառված է «սեւ ցուցակում» ԼՂՀ այցելության համար։ Նման անձանց մուտքն Ադրբեջան արգելվում է, Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ հետախուզում էր հայտարարել՝ «Պետական սահմանի մասին» օրենքը խախտելու համար:
Հունվարի 17-ին Բելառուսի դատախազությունը որոշել էր բավարարել Ադրբեջանի պահանջը եւ արտահանձնել Լապշինին Ադրբեջանին։ Իսկ հունվարի 26-ին Մինսկի դատարանը մերժել էր Լապշինի փաստաբանների բողոքը:
Փետրվարի 7-ի երեկոյան Ալեքսանդր Լապշինին Բաքու են տեղափոխել:
Դաշտ են դուրս գալիս ձեւիստները
Հայաստանի քաղաքացիները հայտնվել են ռուսական անձնագիր ստացողների թոփ-5-ում
Ում դրոշը պետք է երեւա սահմանի այն կողմում
Քաղաքապետարանի ավտոբուսների մասնակցությամբ ամեն 2-րդ վթարի մեղավորը ավտոբուսի վարորդներն են
Երևան-Մոսկվա չվերթի ինքնաթիռում ոչ ադեկվատ վիճակում գտնվող ուղևորը ձերբակալվել է
Լուկաշենկոն խոսել է նախագահի պաշտոնից հեռանալու մասին
Քիմ Քարդաշյանին ծաղրել են SKIMS-ի գովազդում չափից դուրս նիհար Սանտա Կլաուսի պատճառով
61 միլիոն եվրո․ Մբապեն դատարանում հաղթել է ՊՍԺ–ին
Սերժ Սարգսյանը պատասխանել է հարցին՝ կմասնակցի՞ առաջիկա ընտրություններին
Հոգեբուժական փորձաքննությունը հաստատել է, որ Լարիսա Դոլինան վաճառել է բնակարանը հոգեկան անառողջ վիճա...