Կորոնավիրուսի համավարակի պատճառով մոտ 60 մլն մարդ կարող է հայտնվել աղքատության սահմանագծից այն կողմ. ՀԲ

Կորոնավիրուսի համավարակի պատճառով մոտ 60 մլն մարդ կարող է հայտնվել աղքատության սահմանագծից այն կողմ: Այս մասին հայտարարել է Համաշխարհային բանկի նախագահ Դեւիդ Մալփասը:

Նրա խոսքով՝ ՀԲ-ն ակնկալում է, որ այս տարի գլոբալ տնտեսական աճը կկրճատվի 5 տոկոսով: Սա արդեն հանգեցրել է նրան, որ միլիոնավոր մարդիկ կորցրել են իրենց աշխատատեղերը, ձեռնարկությունները սնանկացել են, իսկ ավելի աղքատ երկրներն իրենց վրա են կրում հիմնական հարվածը:

«Գոյատեւման միլիոնավոր միջոցներ ոչնչացել են, իսկ առողջապահության համակարգը սպառնալիքի տակ է հայտնվել ամբողջ աշխարհում»,- ասել է նա: «Մեր գնահատմամբ՝ մինչեւ 60 մլն մարդ կհայտնվի ծայրահեղ աղքատության մեջ, ինչը կզորայացնի վերջին 3 տարում աղքատության դեմ պայքարում ձեռք բերած ամբողջ առաջընթացը»,- նախազգուշացրել է Մալփասը:

Համաշխարհային բանկը «ծայրահեղ աղքատություն» է որակում օրական մեկ մարդուն բաժին ընկնող 1,90 դոլարից պակաս գումարը:

ՀԲ-ն առաջարկում է դրամաշնորհների եւ ցածր տոկոսադրույքներով վարկերի տեսքով 160 մլրդ դոլար, որ աղքատ երկրներին օգնի հաղթահարել ճգնաժամը: Մալփասն ասել է, որ 100 երկրներ, որտեղ բնակվում է աշխարհի բնակչության 70 տոկոսը, արդեն արտակարգ ֆինանսավորում է ստացել: «Չնայած Համաշխարհային բանկը զգալի ռեսուրսներ է տրամադրում, դա անբավարար կլինի»,- հավելել է նա: