Երկար դադարից հետո կորոնավիրուսի թեմայով Թրամփի առաջին ճեպազրույցն ավարտվել է լրագրողների հետ կոնֆլիկտով

ԱՄՆ նախագահ Դոնալդ Թրամփը երկար դադարից հետո Սպիտակ տանը նրա մասնակցությամբ անցկացվող կորոնավիրուսի հետ կապված իրավիճակի թեմայով երկուշաբթի կայացած առաջին ճեպազրույցից հեռացել է լրագրողների հետ վիճաբանությունից հետո, փոխանցում է ՏԱՍՍ-ը:

CBS հեռուստաալիքի աշխատակցուհին Թրամփին հարցրել է՝ ինչո՞ւ է նա մշտապես շեշտադրում կորոնավիրուսի ախտորոշման անցկացվող թեստերի թվով մյուս երկրների հետ ԱՄՆ մրցակցության վրա՝ փոխանակ ուշադրություն դարձնելու երկրի ներսում տիրող իրավիճակին, որտեղ մարդիկ շարունակում են մահանալ:

«Ամբողջ աշխարհում են մարդիկ մահանում: Հնարավոր է՝ սա հարց է, որը պետք է տաք Չինաստանին: Ինձ մի հարցրեք, հարցրեք Չինաստանին: Եթե նրանց հարցնեք, կստանաք անչափ արտասովոր պատասխան»,- բավականին խիստ տոնով պատասխանել է ԱՄՆ նախագահը: The Washington Post պարբերականը եւ մի շարք այլ լրատվամիջոցներ ավելի ուշ ուշադրություն են դարձրել, որ Թրամփը դա ասել է ասիական ծագմամբ լրագրողին:

Վերջինն, իր հերթին, նույնպես վրդովվել է նախագահի պատասխանից եւ հետաքրքրվել է, թե ինչո՞ւ է նա Չինաստանի մասին ասում հենց իրեն: Թրամփը պարզաբանել է, որ դա կոնկրետ նրան չի ասում, այլ բոլորին, ովքեր տալիս են «նողկալի հարցեր», որից հետո ընդհատել է լրագրողին՝ անդրադառնալով CNN հեռուստաալիքի լրագրողին:

Նա, իր հերթին, չի տվել հարցը, այլ որոշել է սպասել՝ գործընկերջը խոսքն ավարտելու հնարավորություն տալով: Այդ ժամանակ Թրամփը, նրան շրջանցելով, ձայնը տվել է հաջորդ մասնակցին: CNN-ի լրագրողն, այնուամենայնիվ, փորձել է հարցը տալ, բայց Թրամփն ընդհատել է նրան՝ նշելով, որ նրան ձայն տվել էր, բայց նա չօգտվեց հնարավորությունից: Մի քանի ռեպլիկներ փոխանակելուց հետո Թրամփը հրաժեշտ է տվել ներկաներին եւ ճեպազրույցից հեռացել: