Կոնգրեսը կհրապարակի ԱՄՆ ընտրություններին ռուսական միջամտության մասին վեց հազար էջանոց փաստաթղթերը

ԱՄՆ Կոնգրեսի Ներկայացուցիչների պալատի հետախուզության հարցերով հատուկ հանձնաժողովը պատրաստվում է հրապարակել վկաների ցուցմունքների 53 սղագրություն, որը վերաբերում է 2016 թվականի ԱՄՆ նախագահական ընտրություններին Ռուսաստանի հավանական միջամտությանը, գրում է Politico թերթը։

Նշվում է, որ փաստաթղթերը կապված են հանրապետականների հետաքննության հետ. նրանք հիշյալ հանձնաժողովը ղեկավարել են մինչև 2019 թվականը:

Ըստ աղբյուրի՝ ԱՄՆ նախագահ Դոնալդ Թրամփի կողմնակիցները հանձնաժողովի գործող նախագահ, դեմոկրատ Ադամ Շիֆին կոչ են արել հրապարակել փաստաթղթերը:

Նշվում է, որ ԱՄՆ ազգային հետախուզության տնօրենի պաշտոնակատար Ռիչարդ Գրենելն այս շաբաթ Շիֆին տեղեկացրել է, որ ցուցմունքների՝ ավելի քան վեց հազար էջանոց սղագրությունները կարող են հրապարակվել:

Օրենսդիրները մտադիր են որքան հնարավոր է շուտ վերլուծել հետախուզության ներկայացրած փաստաթղթերի խմբագրված տարբերակները։

Ինչպես ընդգծել է թերթը, սպասվում է, որ «հազարավոր էջեր պարունակող նյութերը վերստին կթարմացնեն Դոնալդ Թրամփի նախընտրական արշավի հետ կապված սկանդալը»:

Հիշեցնենք, որ ամերիկյան ընտրություններին ռուսական հավանական միջամտության հետ կապված սկանդալը ծագել է 2016 թվականին Թրամփի ընտրվելուց հետո:

2019 թվականի ապրիլին ԱՄՆ Արդարադատության նախարարությունը հրապարակել է ռուսական միջամտության հարցի քննությամբ զբաղվող հատուկ դատախազ Ռոբերտ Մյուլերի զեկույցը, որում Թրամփի և ռուսական իշխանությունների գաղտնի պայմանավորվածության վերաբերյալ ապացույցներ չկան: