Բելառուսը, չնայած կորոնավիրուսին, շարունակում է պատրաստվել Հայրենական մեծ պատերազմում տարած հաղթանակի 75-ամյակի զորահանդեսին

 Բելառուսը շարունակում է պատրաստվել Հայրենական մեծ պատերազմում տարած հաղթանակի 75-ամյակի առիթով ծրագրված զորահանդեսին, որին մասնակցելու է 185 միավոր տեխնիկա: Այս մասին տեղեկացնում է «ՌԻԱ Նովոստի» գործակալությունը` հղում տալով Բելառուսի պաշտպանության նախարարության մամուլի ծառայությանը:

Ավելի վաղ Բելառուսի արտգործնախարար Վլադիմիր Մակեյը հայտարարել էր, որ Մինսկում Հաղթանակի օրվան նվիրված զորահանդեսի անցկացման վերաբերյալ երկրի իշխանությունները որոշում կկայացնեն Մայիսի 9-ին նախորդող օրերին` հաշվի առնելով կորոնավիրուսի տարածման հետ կապված իրավիճակը:

«Շարունակվում է Հայրենական մեծ պատերազմում խորհրդային ժողովրդի տարած հաղթանակի 75-ամյակին նվիրված զորահանդեսին մեխանիզացված շարասյան պատրաստությունը: Այս օրերին մարտական հաշվարկներն ու ռազմական տեխնիկայի անձնակազմերը Լիպկիի օդակայանի հարակից տարածքում մշակում են գործողությունների համակարգվածության հարցերը»,-նշված է երկրի պաշտպանության նախարարության հաղորդագրության մեջ:

Նախարարության ներկայացրած տվյալների համաձայն՝ ծրագրվում է, որ շարասյան կազմում կանցնի 18 հանդիսավոր հաշվարկ` լեգենդար Т-34 տանկի գլխավորությամբ, ընդհանուր առմամբ զորահանդեսին կներառվի 185 միավոր տեխնիկա: Շարասյան երկարությունը շուրջ 2 կմ կկազմի: Այս տարվա զորահանդեսը կտարբերվի նրանով, որ դրանում կներգրավվեն զինված ուժերի ռազմական տեխնիկայի միայն նոր և թարմացված օրինակները, ՆԳՆ ներքին զորքերի «Լիս» թեթև զրահապատ տրանսպորտային միջոցների հանդիսավոր հաշվարկը և հանրապետության ռազմական արդյունաբերության պետական կոմիտեի հանդիսավոր հաշվարկը, որը ներկայացված կլինի 27 նոր տեսակի զենքերով և ռազմական տեխնիկայով:

«Մեխանիզացված շարասյան կազմում կլինեն հզոր զրահապատ մեքենաներ, զենիթահրթիռային համակարգեր, հրետանային և հրթիռային համակարգեր: Դրանց թվում կլինեն Т-72Б3 տանկեր, БТР-80 և БТР-70МБ1 զրահափոխադրիչներ, «ԲելԳրադ» և «Պոլոնեզ» համազարկային կրակի ռեակտիվ համակարգեր, «Բոգատիր» և «Դրակոն» մեքենաներ, «Կայման» զրահապատ մեքենաներ և այլ ժամանակակից տեխնոլոգիաներ` արտադրված հենց Բելառուսում»,-տեղեկացրել են նախարարության մամուլի ծառայությունից:

Մարտի 27-ին Բելառուսի նախագահ Ալեքսանդր Լուկաշենկոն հայտարարել էր, որ Մինսկը մտադիր չէ կորոնավիրուսի համավարակի պատճառով չեղարկել Հաղթանակի 75-ամյակին նվիրված միջոցառումները: Նա նշել էր, որ երկրում ծրագրված բոլոր տոնական միջոցառումները կկազմակերպվեն բարձր մակարդակով:

Վերջին տվյալներով՝ Բելառուսում գրանցվել է կորոնավիրուսով վարակման 3281 և մահվան 33 դեպք:

Աշխարհում նոր տեսակի կորոնավիրուսի համավարակի հետևանքով զոհերի թիվը գերազանցել է 120 000-ը՝ հասնելով 126 757-ի, գրանցվել է վարակման 2 000 231 դեպք, ապաքինվել է 484 600 մարդ։ Այս մասին վկայում են Worldometers առցանց թարմացվող կայքի տվյալները։