Այսօր Մշակույթի միջազգային օրն է

Մշակույթի միջազգային օրը աշխարհի շատ երկրներում նշվում է ապրիլի 15-ին։ Այն հիմնադրվել է 1935թ․ ապրիլի 15-ին «Արվեստի ու գիտական հաստատությունների եւ պատմական հուշարձանների պաշտպանության մասին» պայմանագրի ընդունման պատվին, որը միջազգային իրավական պրակտիկայում հայտնի է որպես «Ռերիխի պակտ»։

Պակտի ստորագրման ամսաթիվը որպես Մշակույթի միջազգային օր նշելու նախաձեռնությամբ 1998թ․ հանդես է եկել Մշակույթի պաշտպանության միջազգային լիգան, որն էլ հիմնադրվել է դրանից երկու տարի առաջ՝ Ռերիխների միջազգային կենտրոնի կողմից։ Սա հասարակական կազմակերպություն է, որի գործունեությունը ուղղված է մշակույթի, արվեստի, գիտության, կրոնի ձեռքբերումների պաշտպանությանն ու բազմապատկմանը։ 2008թ․ Ռուսաստանի, Իտալիայի, Իսպանիայի, Արգենտինայի, Մեքսիկայի, Կուբայի, Լատվիայի, Լիտվայի հասարակական կազմակերպությունների նախաձեռնությամբ ստեղծվել է ապրիլի 15-ը Խաղաղության դրոշի ներքո Մշակույթի համաշխարհային օր հաստատելու Միջազգային շարժումը։ Այսօր տոնը նշվում է աշխարհի տարբեր երկրներում։