Լուկաշենկոն հայտարարել է կորոնավիրուսով հիվանդներին անձամբ բուժելու պատրաստակամության մասին

 Բելառուսի նախագահ Ալեքսանդր Լուկաշենկոն այսօր Մինսկում կայացած նիստի ժամանակ հայտարարել է, որ երկրում պետք է ամեն ինչ անել մարդկանց բուժելու համար, այդ թվում նրանց, ովքեր վարակվել են կորոնավիրուսով: Այս մասին տեղեկացնում է belta.by կայքը:

«Ամեն մեկը պետք է իր գործով զբաղվի: Առանց տագնապի, հանգիստ և գեղեցիկ: Մենք միասին պետք է գեղեցիկ ձևով հաղթենք, մենք արժանի ձևով պետք է փրկենք մարդկանց: Մարդը չպետք է մտածի, որ եթե ինքն այնտեղ է ընկել վիրուսով, ուրեմն մահվան է դատապարտված: Ո՛չ: Բոլորին կփրկեն, բոլորին, ում հնարավոր է: Եվ մենք դրա համար պարտավոր ենք ամեն ինչ անել»,-ասել է Բելառուսի նախագահը:

Լուկաշենկոն կոչ է արել թեմայի շուրջ իրարանցում չստեղծել և նշել է, որ անհրաժեշտության դեպքում ինքն էլ պատրաստ է օգնության ձեռք մեկնել բժիշկներին:

«Եթե ինչ-որ բան կարող եմ անել ձեզ համար, ասացեք խնդրեմ: Ես արդեն նախարարին ասել եմ. եթե պետք է, Վլադիմիր Ստեպանովիչ, միասին կգնանք մարդկանց բուժելու: Նա ասում է, որ դեռևս պետք չէ»,-պատմել է Լուկաշենկոն:

Վերջին տվյալներով՝ Բելառուսում գրանցվել է կորոնավիրուսով վարակման 700 դեպք, մահացել է 13 մարդ, առողջացել` 53-ը:

Առողջապահության համաշխարհային կազմակերպությունը մարտի 11-ին նոր կորանավիրուսը համավարակ էր հայտարարել: Վերջին տվյալներով՝ աշխարհում գրանցվել է վարակման 1 347 343 դեպք, 74 769-ը՝ մահվան ելքով, ապաքինվել է 284 882 մարդ։

Համաճարակի օջախ Չինաստանի սահմաններից դուրս վարակը տարածվել է 209 երկրում: