Աֆրիկայում կորոնավիրուսով վարակվածների թիվն անցել է 10 000-ից

 Աֆրիկյան մայրցամաքում կորոնավիրուսով վարակման դեպքերի թիվն անցել է 10 000-ից: Այս մասին տեղեկացնում է «ՌԻԱ Նովոստի» գործակալությունը` հղում անելով Africa CDC կազմակերպությանը:

Աֆրիկյան միության մեջ մտնում է 55 պետություն, որոնցից 52-ում գրանցվել են կորոնավիրուսով վարակման դեպքեր: Ամենաշատ դեպքերը գրանցվել են Հյուսիսային Աֆրիկայի երկրներում` շուրջ 4500 վարակակիր: Ամենաքիչ վարակվածներն Արևելյան Աֆրիկայում են` 861 դեպք:

Ներկա դրությամբ վարակման ամենաշատ դեպքերը գրանցվել են Հարավաֆրիկյան Հանրապետությունում` 1686 վարակման և 12 մահվան դեպք: Այս պետությանը հաջորդում են Ալժիրն ու Եգիպտոսը` համապատասխանաբար 1423 և 1322 վարակման դեպք:

Մահվան դեպքերի քանակով առաջատարն Ալժիրն է`173 դեպք: Մեծ թվով մահվան դեպքեր են գրանցվել նաև Եգիպտոսում և Մարոկկոյում` համապատասխանաբար 85 և 80:

Ներկա դրությամբ միության միայն երեք երկրում չի գրանցվել կորոնավիրուսով վարակման հաստատված դեպք, դրանք են Լեսոտոն, Արևմտյան Սահարան և Կոմորյան կղզիները: