Մեծ Բրիտանիայի խորհրդարանը կորոնավիրուսի պատճառով մեկ ամսով կփակվի. Forbes

Մեծ Բրիտանիայի խորհրդարանը նոր տեսակի կորոնավիրուսի համավարակի ֆոնին չորեքշաբթի օրվանից սկսած մեկ ամսով կփակվի: Այս քայլը ձեռնարկվել է օրենսդիրների շրջանում վարակի տարածումը կանխելու նպատակով:

Նախկինում որոշվել էր Սուրբ Զատիկի առթիվ արձակուրդ գնալ մարտի 31-ից, սակայն կորոնավիրուսի տարածումը կանխելու նպատակով որոշվել է ավելի շուտ մեկուսանալ և աշխատանքի վայր չգալ մինչև ապրիլի 21-ը, գրում է forbes.com կայքը։

Աղբյուրը մանրամասնում է, որ օրենսդիրները հնարավորության դեպքում կարող են տնից աշխատել, տեսակապի միջոցով հանդիպումներ կազմակերպել:

Նշվում է, որ խորհրդարանի Համայնքների պալատը վերջին օրերին աչքի չի ընկնում զբաղվածությամբ․ աշխատակիցները հիմնականում այցելում են միայն գլխավոր քննարկումներին և սոցիալական հեռավորությունը պահելու համար իրարից հեռու նստում։

Հայտնի է, որ Համայնքների պալատի մի շարք օրենսդիրներ էլ արդեն ինքնամեկուսացել են կորոնավիրուսով վարակվելու, մյուսներն էլ՝ նրանց հետ շփում ունենալու պատճառով։ Նշվում է, որ երկրի՝ կորոնավիրուսով վարակված առողջապահության նախարար Նեյդին Դորիսն իր հերթին արդեն ապաքինվել և վերադարձել է Համայնքների պալատ։

Մեծ Բրիտանիայում գրանցվել է կորոնավիրուսով վարակման 8100 դեպք, որից 422-ը՝ մահվան ելքով։

Հայտնի է, որ ամբողջ աշխարհում նոր տեսակի կորոնավիրուսով վարակվածների թիվը հասել է 435 036-ի, որից 19 607-ը՝ մահվան ելքով։ Հիվանդությունից ապաքինվել է ավելի քան 111 870 մարդ։