Կանադան և Ավստրալիան կորոնավիրուսի պատճառով հրաժարվել են մասնակցել Տոկիոյում Ամառային օլիմպիական խաղերին

Կանադան և Ավստրալիան կորոնավիրուսի համավարակի հետ կապված ռիսկերի պատճառով իրենց մարզիկներին չեն ուղարկի Տոկիոյում կայանալիք Ամառային օլիմպիական խաղերին, ասված է երկու երկրների օլիմպիական կոմիտեների առանձին հայտարարություններում, գրում է CNN-ը։

Բացի այդ, կոմիտեները նաև կոչ են արել Խաղերի անցկացումը հետաձգել մինչև 2021 թվականը։

«Թեև մենք գիտակցում ենք հետաձգման հետ կապված անխուսափելի դժվարությունները, չկա ավելի կարևոր բան, քան մեր մարզիկների և միջազգային հանրության առողջությունն ու անվտանգությունը»,- ասված է Կանադայի օլիմպիական կոմիտեի և Կանադայի պարալիմպիկ կոմիտեի համատեղ հայտարարությունում:

«Խոսքը ոչ միայն մարզիկների, այլև բնակչության առողջության մասին է»,- ասված է հաղորդագրությունում։

Ավստրալիայի օլիմպիական կոմիտեի գործադիր խորհուրդը երկուշաբթի հեռուստահամաժողովի ընթացքում միաձայն որոշում է ընդունել առ այն, որ Ավստրալիայի օլիմպիական հավաքականը, կորոնավիրուսով պայմանավորված, չի կարող մասնակցել Օլիմպիական խաղերին:

«Մեր մարզիկներն այժմ պետք է առաջնահերթ ուշադրություն դարձնեն իրենց առողջությանը»,- ասված է հաղորդագրությունում։

Ճապոնիայի վարչապետ Սինձո Աբեն, չբացառելով Տոկիոյում Ամառային օլիմպիական խաղերի հետաձգումն, ավելի վաղ ասել էր․ «Միջազգային օլիմպիական կոմիտեի (ՄՕԿ) դիրքորոշումը համապատասխանում է Խաղերն «ամբողջական ձևաչափով» անցկացնելու տարբերակին, որի մասին ես արդեն խոսել եմ։ Եթե դա հնարավոր չլինի իրականացնել, ապա պետք է հետաձգման որոշում կայացվի՝ ելնելով այն հանգամանքից, որ մենք առաջին հերթին պետք է մտածենք մարզիկների մասին»։

Ավելի վաղ ՄՕԿ-ը տարածել էր կազմակերպության ղեկավար Թոմաս Բախի նամակը, որում նշվում է, որ Տոկիոյում Ամառային օլիմպիական խաղերի անցկացման հնարավորության վերաբերյալ որոշումը կընդունվի առաջիկա չորս շաբաթվա ընթացքում ՝ հաշվի առնելով կորոնավիրուսի տարածման հետ կապված իրադրությունը: Բախը նաև նշել է, որ Խաղերի չեղարկումը ոչ մի խնդիր չի լուծի, ուստի՝ օրակարգում այդ հարցը դեռևս չկա: Մինչ այդ ՄՕԿ-ը և Ճապոնիայի իշխանությունները հետևողական դիրքորոշում էին որդեգրել՝ հայտարարելով, որ Օլիմպիական խաղերը կկայանան նախանշված ժամկետներում: Տոկիոյում Ամառային օլիմպիական խաղերը նախատեսված է անցկացնել հուլիսի 24-ից օգոստոսի 9-ը։

Հայտնի է, որ ամբողջ աշխարհում կորոնավիրուսով վարակվածների թիվը գերազանցել է 338 000-ը, ավելի քան 14 000 մարդ մահացել է, ապաքինվել՝ ավելի քան 99 000-ը: Չինաստանի իշխանություններն անհայտ տեսակի վարակի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: