Պեկինը պատասխանել է Թրամփի մեղադրանքներին

ԱՄՆ նախագահ Դոնալդ Թրամփի վերջին հայտարարությունները չինական իշխանությունների կողմից համաշխարհային հանրությանը նոր կորոնավիրուսի մասին «ժամանակին չտեղեկացվելու» վերաբերյալ բացարձակապես չեն համապատասխանում իրականությանը եւ Չինաստանի կերպարը արատավորող զրպարտչական հայտարարությունների շարքից են: Այս մասին հայտարարել է Չինաստանի արտգործնախարարության պաշտոնական ներկայացուցիչ Գեն Շունգը, փոխանցում է ՏԱՍՍ-ը:

«Վերջին շրջանում Միացյալ Նահանգներում տարբեր անձինք անընդհատ զրպարտում են Չինաստանը` զուգահեռ անցկացնելով մեր երկրի եւ նոր կորոնավիրուսի համաճարակի միջեւ: Դա կտրուկ դժգոհություն եւ բողոք է առաջացնում չին ժողովրդի շրջանում,- շեշտել է նա մամուլի ասուլիսին:- Հայտարարություններն առ այն, որ Չինաստանը թաքցնում է փաստերը, պետք է իրականության բացարձակ խեղաթյուրում համարել»:

Դիվանագետի խոսքով` կորոնավիրուսի ծագման խնդիրը «մի հարց է, որով պետք է զբաղվի գիտությունը»: «Առողջապահության համաշխարհային կազմակերպությունն (ԱՀԿ) արդեն հստակ սահմանված տեսակետ է հայտնել այս հարցում. Այն դեմ է հանդես եկել, որպեսզի համաճարակը ասոցացվի որեւէ կոնկրետ երկրի կամ տարածաշրջանի հետ, արատավորման դեմ», - հիշեցրել թ Գեն Շուանը:

Դիվանագետը նշել է, որ Պեկինը հիվանդության տարածման ամենասկզբից «համապարփակ եւ խիստ միջոցներ է ձեռնարկել»` կարողանալով կարճ ժամանակահատվածում ճնշել կորոնավիրուսի բռնկումը: «Չինաստանի ժողովուրդը մեծ զոհողության է գնացել` ամբողջ մարդկության անվտանգությունն ու առողջությունը ապահովելու համար: Չինական կողմը լիակատար թափանցիկություն է ապահովել [կորոնավիրուսի վերաբերյալ տեղեկատվության], թոքաբորբի դեմ պայքարի մեր միջոցները ստացել են համաշխարհային հանրության հավանությունը»,- եզրափակել է պաշտոնական ներկայացուցիչը:
Ավելի վաղ Թրամփը հայտարարել էր, որ աշխարհը «մեծ գին է վճարում Չինաստանից կորոնավիրուսի մասին ուշ տեղեկացման պատճառով»: Նա նշել է, որ լավ կլիներ, եթե Միացյալ Նահանգներում հասարակությունը «մի քանի ամիս առաջ իմանար դեպքերի մասին»: Ամերիկացի առաջնորդն իր խոսքերի որեւէ ապացույց չի մեջբերել: