ԱՄՆ-ն նախատեսում է միգրանտներին անմիջապես Մեքսիկա ուղարկել

ԱՄՆ նախագահ Դոնալդ Թրամփի վարչակազմը մտադիր է դադարեցնել Մեքսիկայի սահմանն ապօրինի հատող մարդկանց ձերբակալել եւ նրանց անմիջապես հայրենիք վերադարձնել, հայտնում է New York Times-ը:

Պարբերականի տեղեկություններով՝ վարչակազմում կարծում են, որ այսպիսի միջոցառումն անհրաժեշտ է կորոնավիրուսի համավարակի դեմ պայքարելու համար, քանի որ սահմանը հատող շատ միգրանտներ արդեն հիվանդ են կամ չունեն իրենց առողջ լինելն ապացուցող փաստաթղթեր:

Վարչակազմի ներկայացուցիչների խոսքով՝ անցակետերը բաց կմնան ԱՄՆ քաղաքացիների, գրին քարտերի տերերի եւ անհրաժեշտ փաստաթղթերով արտասահմանցիների համար: Դրանից բացի, այդ կետերը բաց կլինեն կոմերցիոն փոխադրումների համար:

Ավելի վաղ հաղորդվել էր, որ ԱՄՆ-ում կորոնավիրուսով վարակվածների թիվը անցել է 5 հազարից, մահացել է ոչ պակաս 100 մարդ: Մինչդեռ Մեքսիկայում գրանցվել է վարակման 82 դեպք:

Առողջապահության համաշխարհային կազմակերպությունը մարտի 11-ին COVID-19 նոր կորոնավիրուսի բռնկումը համավարակ է հայտարարել: Աշխարհում ավելի քան 159 երկրներում արդեն 179 հազար մարդ է վարակված, մեծ մասն առողջացել է, ավելի քան 7,4 հազարը մահացել է: