ԱՄԷ-ն մտադիր է վաճառել նավթ 1 բարելը 2,75 դոլար զեղչով

ԱՄԷ-ում ADNOC ազգային նավթային ընկերությունը հայտարարել է, որ ապրիլին մտադիր է վաճառել նավթ 1 բարելը 2,75 դոլար զեղչով՝ ի տարբերություն բենչմարկի՝ Dubai-ի տեսակի: Այդ մասին հայտնել է Bloomberg գործակալությունը՝ հղում կատարելով ընկերության հայտարարությանը:

Նշվում է, որ այդ որոշումը ADNOC-ն ընդունել է «աննախադեպ շուկայական պայմանների» պատճառով: Գործակալության տեղեկություններով՝ արդյունքում գինը կնվազի 4,63 դոլարով՝ ի տարբերություն ընկերության կողմից մարտին սահմանված արժեքի, հաղորդում է ՏԱՍՍ-ը:

Չորեքշաբթի ADNOC-ը հայտարարել էր, որ ապրիլից մեծացնելու է նավթի արդյունահանումն օրական ավելի քան 1 մլն բարելով:

Հինգշաբթի Bloomberg ընկերությունը տեղեկացրել էր 1 բարելը 25 դոլարով Եվրոպային նավթ մատակարարելու վերաբերյալ Սաուդյան Արաբիայի ծրագրերի մասին:

Մոսկվայի ժամանակով 20:56-ի դրությամբ՝ Brent տեսակի նավթի ֆյուչերսի արժեքը 2020 թվականի մայիսին մատակարարելու դեպքում Լոնդոնում ICE արեւտրային բորսայում աճում է 3,55 տոկոսով՝ հասնելով մինչեւ 34,4 դոլարի մեկ բարելի դիմաց:

Մարտի 6-ին Վիենայում կայացած ՕՊԷՔ+ հանդիպման ժամանակ Սաուդյան Արաբիան չէր կարողացել պայմանավորվել Ռուսաստանի հետ նավթարդյունահանման կրճատման մասին համաձայնագիրը երկարացնելու մասին, որը գործում է 2017 թվականից: Գործարքի ձախողման պատճառով մարտի 9-ի աճուրդի ժամանակ Brent տեսակի նավթի գինը մեկ ակնթարթում նվազել էր բարելի դիմաց 35 դոլարով: