Էրդողանը, զգուշանալով կորոնավիրուսից, Բրյուսելում հրաժարվել է ձեռքսեղմումներից (տեսանյութեր)

Թուրքիայի նախագահ Ռեջեփ Թայիփ Էրդողանի գլխավորությամբ Բրյուսել մեկնած պատվիրակությունը կորոնավիրուսի տարածման ֆոնին անվտանգության խիստ կանոնների է հետևել և այցի ընթացքում հրաժարվել ձեռքսեղմումներից: Այս մասին տեղեկացնում է «Անադոլու» գործակալությունը:

Լրագրողների ուշադրությունից չի վրիպել այն փաստը, որ թուրք առաջնորդը հրաժարվել է ձեռքսեղմումից ինչպես Ստամբուլից Բրյուսել մեկնելու պահին, այնպես էլ Բրյուսելի օդանավակայանում հանդիպումների ժամանակ: Թուրքիայի նախագահն իրեն հանդիպողներին ողջունել է՝ ձեռքը կրծքին դնելով:

Բելգիա կատարած այցի շրջանակում Էրդողանը խոսել է կորոնավիրուսի տարածման թեմայից՝ իր խոսքն ուղղելով Եվրամիությունում Թուրքիայի մշտական ներկայացուցչության դիմաց հավաքված էթնիկ թուրքերին:

«Պետք է խիստ անվտանգության քայլեր ձեռնարկել, հետևել հիգիենային: Նայեք աշխարհի տարբեր երկրներում տիրող վիճակին: Արևմուտքում, որտեղ խոսում են զարգացած բժշկության մասին, հարյուրավոր մարդիկ են մահանում: Հուսով եմ, որ մարդկությունը շուտով կհաղթահարի այս սպառնալիքը»,-հայտարարել է Էրդողանը:

ՆԱՏՕ-ի գլխավոր քարտուղար Յենս Ստոլտենբերգի հետ համատեղ մամուլի ասուլիսից հետո Էրդողանը նրան ևս ձեռքսեղմումով հրաժեշտ չի տվել, ինչը գրավել է մամուլի ուշադրությունը: Դրա փոխարեն Էրդողանը ձեռքը կրկին դրել է կրծքին` ասելով «կորոնա»:

Ստոլտենբերգը նույն ժեստով է հրաժեշտ տվել Թուրքիայի նախագահին: