Apple-ի հիմնադրի այրին որոշել է երեխաներին ժառանգություն չթողնել

 Ամերիկյան Apple ընկերության հիմնադիր Սթիվ Ջոբսի այրին՝ բարերար Լորեն Փաուել Ջոբսը, մտադիր չէ երեխաներին ժառանգել բազմամիլիարդանոց կարողությունը, որը նրան է հասել ամուսնու մահից հետո: Lenta.ru-ի փոխանցմամբ՝ այս մասին վերջինս հայտնել է The New York Times-ին տված հարցազրույցում:

Փաուել Ջոբսի կարծիքով՝ ճիշտ չէ հսկայական հարստություն կուտակել մեկ ընտանիքի ձեռքում, ինչպես արել են Ռոքֆելլերները 19-րդ դարում: Իր կարողությունը նա ժառանգել է ամուսնուց, որը նույնպես իր առաջ հարստանալու խնդիր չէր դրել: Այժմ նրա խոսքով՝ ինքը բարեգործական աշխատանքի միջոցով փորձում է տնօրինել կարողությունն այնպես, որ այն հնարավորինս շատ օգուտ բերի անապահով մարդկանց:

«Եթե ես բավականին երկար ապրեմ, այդ կարողությունը կավարտվի իմ կյանքի հետ միասին»,- ասել է Ջոբսի այրին՝ հավելելով, որ իր երեխաները տեղյակ են իրենց հոր ժառանգության նկատմամբ իր վերաբերմունքի մասին:

2004-ին Լորեն Փաուել Ջոբսը հիմնադրել է Emerson Collective բարեգործական կազմակերպությունը, որը գումար է ներդնում մշակութային և կրթական ծրագրերում: Ջոբսի մահից հետո նա ավելի շատ գումար է նվիրաբերել հիմնադրամին:

Bloomberg-ի՝ միլիարդատերերի վարկանշային աղյուսակի տվյալների համաձայն՝ ներկա պահին Լորեն Փաուել Ջոբսի կարողությունը կազմում է մոտ 24 մլրդ դոլար: Նա զաղեցնում է 38-րդ հորիզոնականը մոլորակի ամենահարուստ մարդկանց վարկանիշում: Ջոբսի հետ նա երեք երեխա է ունեցել՝ որդի Ռիդը և դուստրեր Էրինն ու Եվան: